Оросын Холбооны хамгаалалтын албанаас олон нийтийн саналын судалгаа явуулжээ. Ийм судалгааг Кремлийн захиалгаар хийдэг бөгөөд үр дүнг нь нийтэд ил зарладаггүй, дотоод ажилд зориулан ашигладаг аж.
Энэ судалгааны үр дүнг Медуза агентлагийн редакци олж авсан байна. Судалгааны үр дүнгээс харахад, судалгаанд оролцсон иргэдийн 55 хувь нь Украинтай энхийн хэлэлцээ хийхийг дэмжиж байгаа бол ердөө 25 хувь нь дайныг үргэлжлүүлэхийн төлөө саналаа өгчээ.
Энэ үр дүн 10 дугаар сард "Левада-Центр"-ийн явуулсан судалгааны үр дүнтэй давхцаж байгаа юм. Тухайн үед судалгаанд оролцсон хүмүүсийн 57 хувь нь энхийн хэлэлцээг дэмжсэн бол дайныг дэмжсэн хүн 27 хувь байжээ.
Орост явуулсан нууц судалгаанаас харахад, Оросын иргэд сүүлийн үед л дайныг эсэргүүцэх нь улам нэмэгдсэн байна. Өмнө нь, 2022 оны долдугаар сард энэ төрлийн судалгаа явуулахад Украинтай хэлэлцээ хийхийг ердөө 30 хувь нь дэмжиж байжээ.
"Левада-Центр" олон нийтийн санал бодлын судалгааны байгууллагын захирал Медуз агентлагт өгсөн ярилцлагадаа Украинтай хэлэлцээ хийхийг дэмжиж байгаа хүмүүсийн тоо есдүгээр сарын 21-нд зарласан дайчилгаанаас хойш эрс өссөн байна.
Г.Бямбасүрэн
Уншиж байна |