Улаанбаатар хотын авто замын түгжрэлийг бууруулах үндэсний хорооны дарга Ж.Сүхбаатар өнөөдрөөс /2022.12.05/ эхлэн Энхтайваны өргөн чөлөөний замын нэгдүгээр эгнээгээр нийтийн тээврийн автобус явуулах журмын хэрэгжилтэд онцгой анхаарах үүргийг цагдаагийн байгууллагад өгсөн. Энэ дагуу өнөөдрөөс зам дээр цагдаагийн 500 албан хаагч үүрэг гүйцэтгэж эхэллээ. Цагдаагийн 100 гаруй алба хаагч өдөр тутам хөдөлгөөн зохицуулдаг байсан бол сайдын үүргийн дагуу 400 гаруй албан хаагчийг нэмж, 200 гаруй хяналтын цэгт ажиллуулж эхлэв. Тэд Энхтайван өргөн чөлөөнд, Офицеруудын ордны аюулгүйн тойргоос Таван шарын автобусны буудал хүртэлх замын нэгдүгээр эгнээг чөлөөлөх үүрэгтэй. Нэгдүгээр эгнээгээр

• Нийтийн тээврийн үйлчилгээний автобус, троллейбус

• Тусгай дуут болон гэрэл дохио бүхий шуурхай албаны автомашин

• Нийтийн тээврийн газраас олгосон зөвшөөрөлтэй стандартын суудлын такси

• “Хүүхдийн автобус”, Монголын хөгжлийн бэрхшээлтэй иргэдийн эрхийг хамгаалах төвөөс олгогдсон “Тулгуур эрхтний бэрхшээлтэй хүн” таних тэмдэг бүхий тээврийн хэрэгслийг зорчуулна.

Харин бусад нь хориотой, явбал торгуулна. Гэхдээ энэ шинэ зүйл биш. Угаас Энхтайваны өргөн чөлөөний замын нэгдүгээр эгнээгээр автобус зорчдог. Нэгдүгээр эгнээгээр явсан тээврийн хэрэгслийг торгосоор ч ирсэн. Энэ оны эхний 11 сарын байдлаар нэгдүгээр эгнээгээр явсан 382 374 тээврийн хэрэгслийн жолоочийг зөрчлийн хуулийн дагуу 20 000 төгрөгөөр торгосон мэдээллийг Тээврийн цагдаагийн алба өгч байна. Тэгэхээр өнөөдрөөс жолооч нарыг торгох арга хэмжээг эрчимжүүлж байна гэсэн үг.

 

Таван шарын автобусны буудлаас Офицеруудын ордны аюулгүйн тойрог хүртэлх зам дагуу 14 уулзвар, зогсоол, хороолол, ШТС зэргээс төв замтай нийлсэн 155 гарц, 39 автобусны буудал, авто замын зорчих хэсэгтэй залгаа 25 зогсоол байдаг гэнэ. Энэ уулзваруудаас хөдөлгөөн эхлэх болон орохоор яваа бол шууд л хоёрдугаар эгнээ рүү чичрэхээс өөр аргагүй. Нэгдүгээр эгнээнд саатвал шууд торгуулна.

Ингэж нэгдүгээр эгнээг чөлөөлснөөр нийтийн тээрийн автобус, зөвшөөрөлтэй такси үйлчилгээ түргэн шуурхай, чөлөөтэй зорчиж, иргэд хувийн машинаасаа татгалзана гэж сайд, дарга нар үзэж байна. Гэхдээ нийтийн тээврийн автобус чинь хангалттай бий юу? Зам чөлөөлсөн учраас түгжрэхгүй. Гэвч автобус ирэхгүй, иргэдийг хүлээлгэсэн хэвээр байсаар байвал хэн хариуцлага хүлээх үү? Иргэдийг, жолооч нарыг торгох арга хэмжээг эрчимжүүлсэн түгжрэлийн сайд уу эсвэл автобусны парк шинэчлэлийн тухай ярьсаар өвөлтэй золгосон хотын дарга уу?!

Б.Хэрлэн