-Ард түмэн хэзээ ч тэсэрч болзошгүй цагтай бөмбөг болсноо удаа дараа харууллаа-

Хоёр өдөр үргэлжилсэн залуусын жагсаал албадан тараах, баривчлах сануулгаар тарлаа. Хэн зохион байгуулсан, ямар зорилго, шалтгаантай байснаас үл хамааран Монголын залуус нэгдэж чаддаг болсноо удаа дараа харуулж байна. Сонгуульд оролцдоггүй, өөрсдийнхөө төлөө дуугардаггүй хэмээн чичлүүрсээр ирсэн залуус өнөө цагт өөр болсон. Залуус төр засаг, эрх баригчдад шаардлага тавьж, тэднээс хариуцлага нэхэж байна. Залуусын сэтгэхүйгээс гадна Монголын нийгэм, улс төрийн өнөөгийн байдал үүнд нөлөөлсөн нь тодорхой.

Цар тахлын үед дөнгөж төрсөн эмэгтэйг гэрийн шаахай, халадтай зөөвөрлөснөөс үүдсэн жагсаалаар тухайн үеийн Ерөнхий сайд У.Хүрэлсүхийн Засгийн газар бүрэн бүрэлдэхүүнээрээ огцорч байлаа. Улстөрч нь жагсаалыг “ашигласан” байж болох ч залуус нэгдэж чаддагаа харуулсан. Үүний дараа Засгийн газрыг “Ажлаа хий”-ийг шаардаж, хэдэн зуун залуус төв талбайд жагсаж, Ерөнхий сайдыг өмнөө зогсоож чадсан. Харин өнгөрсөн хоёр өдөр нүүрсний хулгайчдыг илчилж, хариуцлага тооцохыг шаардан, жагслаа.

Гурван удаагийн жагсаалын оролцогчдын ихэнх нь залуус байв. Нүүрсний хулгайчдад хариуцлага тооцохыг шаардсан жагсаалд оролцогчдын 90 гаруй хувь нь залуус байсныг Хуульзүй, дотоод хэргийн яамны удирдлага хэлж байлаа. Энэ бол залуус шударга бус байдал, авлигачид, төрийн хулгайчидтай эвлэрэхгүй гэдгээ хангалттай харуулсан нотолгоо.

 

Залууст эх орондоо сайхан амьдрах боломж хомс, нийгэм, улс төр шударга бус, хангалттай цалин хөлсгүй гээд гудамжинд гарч жагсах, үгээ хэлэх хангалттай шалтгаан бий. Тэд зорилго, шалтгаанаа ойлгосон, эс ойлгосноос үл хамааран нэгдэн нийлж, жагсахад хэзээд бэлэн байгаагаа удаа дараа харууллаа.

Эрх баригчид, улстөрчид, хууль хяналтын байгууллагынхан 30 жил ард түмнийг аргалж аргацааж, шударга бус аашилж, ядуу зүдүү амьдруулсаар ирсэн бол одооноос цаг үе, сонгогчид, залуус өөр болсныг санаж явахад илүүдэхгүй. Тэд хэзээ ч тэсэрч дэлбэрч болзошгүй цагтай бөмбөг болсноо харуулсаар байна.

Залуусын удаа дараагийн жагсаал эрх баригчид, улстөрчдөд албан тушаал мөнх бишийг, шударга бусыг хаацайлаад хол явахгүйг сануулсаар байна. Ард түмэн цагаан цаас байхаа больсон, басамжлах хэрэггүй. Тэд хэрсүүжиж, нийгэм, улс төрийн амьдралд өөрсдийн гэсэн оролцоотой болсон. Дахин хэзээ мөдгүй, хэдэн мянгаараа жагсаж, эрх баригчдыг суудлаас нь татан унагаж ч магадгүй. Олны хүч улстөрчдөд биш ард түмэнд бий.

Б.Хэрлэн