УИХ-ын есөн гишүүн нүүрсний хулгайн асуудлаар нээлттэй сонсгол зохион байгуулах хүсэлтийг гаргасан. Энэ дагуу УИХ-ын дарга Г.Занданшатар Эдийн засгийн байнгын хороонд сонсголын товыг тогтоох үүргийг өгсөн. Эдийн засгийн байнгын хороо өчигдрийн хуралдаанаараа сонсгол зохион байгуулах товыг тогтоож, 2022 оны 12 дугаар сарын 21-ний өдрийн 10.00 цаг хийхээр зарлалаа. Тус сонсголыг УИХ-ын гишүүн С.Чинзориг даргалан явуулна.

Ерөнхий хяналтын сонсголыг дөрвөн сэдвийн хүрээнд явуулах аж. Үүнд:

1. “Эрдэнэс Тавантолгой” ХХК-ийн үйл ажиллагааны хүрээнд өнөөг хүртэл төлбөрийг ашигт малтмал, түүхий эдээр төлөх нөхцөлтэй оффтэйк болон төлбөрийг урьдчилан авсан, ашигласан гэрээнүүдийн талаар

2. 2020-2022 онд улсын хэмжээнд коксжих нүүрс олборлосон аж ахуйн нэгжүүд, олборлолтын хэмжээ, коксжих нүүрс тээвэрлэсэн аж ахуйн нэгжүүд, тэдгээрийн олсон орлого, Монгол Улсын боомт тус бүрээр экспортолсон коксжих нүүрсний дэлгэрэнгүй мэдээллийг сонсох 

3.Коксжих нүүрсний олон улсын зах зээл дээрх болон БНХАУ-ын үнэ болон Монгол Улсын экспортлох өртөг хоорондын хэт их зөрүүний учир шалтгааныг тодорхой сонсож, энэ зөрүү мөнгө нь хоёр улсын тодорхой этгээдүүдийн авлига, татвараас зайлсхийх нөхцөлийг бүрдүүлдэг эсэх

3.“Эрдэнэс Тавантолгой” компанийн зүгээс Тавантолгой-Зүүнбаян, Тавантолгой-Гашуунсухайт чиглэлийн төмөр замын бүтээн байгуулалтын төслүүдэд ямар хэлбэрээр, хэр хэмжээний санхүүжилт гарган оролцсон, эдгээр төмөр замуудын 1  км тутмыг ямар хэмжээний өртгөөр барьж байгуулсан тухай зэрэг асуудлыг хэлэлцэнэ.