ОХУ Украинтай хийж буй дайнд ихээхэн хохирол амсан, улмаар цэргийн бие бүрэлдэхүүнээ нөхөх үүднээс өнгөрсөн оны есдүгээр сард хэсэгчилсэн дайчилгаа зарласан. Дайчлагдсан эрчүүдийг цөөн хоног бэлтгэлд хамруулаад фронт руу илгээж байв. 

Ийнхүү фронт руу явсан дайчлагдсан эрчүүдээс 538 нь амиа алдсан гэж ВВС агентлаг мэдээлсэн байна. ВВС, Медиазона хэвлэл Оросын амиа алдсан цэргүүдийн тоог хамтран гаргахдаа Оросын хэвлэл мэдээлэл, бүс нутгийн эрх баригчдын мэдээлэл зэрэг нээлттэй эх сурвалжаар баталгаажсан мэдээллийг ашиглаж байгаа тул бодит байдал дээр амиа алдсан хүний тоо хавьгүй их байх магадлал өндөр хэмээн онцолжээ.

Мөн дээрх тоонд шинэ жилийн шөнө Донецк мужийн Макеевка дахь казармд өгсөн цохилтын улмаас амиа алдсан хүний тоо багтаагүй аж. Энэ цохилтын улмаас 63 хүн амиа алдсан эгж Оросын Батлан хамгаалах яам хүлээн зөвшөөрсөн бол Украины тал олон зуун хүн амиа алдсан гэж мэдээлж байна.

ВВС агентлаг болон Медиазона хэвлэл хамгийн сүүлд 12 дугаар сарын есний өдөр Оросын цэргийн бие бүрэлдэхүүний хохирлын талаар мэдээлж байлаа. Тухайн үед 10 мянган цэргийн алба хаагч амиа алдсанаас 430 нь дайчлагдсан эрчүүд байсан гэж хэвлэлүүд ноцолж байв. Тэдний 36 нь цэргийн анги нэгтгэлийн нутагт буюу фронтод очихоосоо ч өмнө амиа алджээ. Амиа алдсан шалтгаанууд нь зүрхний шигдээс, золгүй явдал болон согтууруулах ундаа хэтрүүлэн хэрэглэсэн явдал байсан гэнэ.

Орос болон Украины тал байлдааны хохирлын талаарх мэдээллийг нийтэд өгдөггүй. Хамгийн сүүлд есдүгээр сарын 21-ний өдөр Оросын Батлан хамгаалах яам хохирлынхоо талаар мэдээлж байлаа. Тухайн үед Шойгу мэдэгдэхдээ амиа алдсан хүний тоо 5937 хэмээж байв. Харин АНУ-ын мэдэгдсэнээр Орос, Украины арми аль аль нь 100 мянга орчим цэргээ алдсан гэнэ.

Г.Бямбасүрэн