АНУ-ын Лос-Анжелес хотын орчимд байх Монтерей-Парк хотын нэгэн байгууллагын нутаг дэвсгэр дээр гэмт этгээд хүмүүс рүү буудсаны улмаас 10 хүн амиа алдсан хэрэг гарчээ. 

Орон нутгийн цагдаагийн газрын мэдээлснээр, энэ хэрэг орон нутгийнх цагаар бямба гарагт 22:20 цагт болсон байна. Бямба гарагийн орой хүмүүс сарны тооллоор шинэ он угтах наадамд олон мянгаараа цугласан байна.

Монтерей-Парк хотод 60 мянган оршин суугч байдгаас  ази гаралтай хүмүүс их байдаг тул жил бүр сарны тооллоор шинэ он угтах наадмыг зохион байгуулдаг аж. Хотын бараг бүх оршин суугч энэ наадамд оролцдог бөгөөд бямба гарагт ч олноороо нэг дор цуглах үед энэ хэрэг болжээ.

"Лос-Анжелес Таймс" сонинд хэргийн нэгэн гэрчийн өгүүлснээр, гурван хүн зоогийн газарт нь гүйж орж ирээд, хаалгаа түгжихийг гуйн, гудамжинд автомат винтовтой хүн гал нээсэн хэмээн хэлсэн гэнэ. Гэмт этгээд цугласан олон руу гал нээсний улмаас 10 хүн амиа алдаж, 10 хүн шархаджээ.

Энэ хэргийг үйлдсэн эр хэргийн газраас зугтаж чадсан, эрх чөлөөтэй яваа гэж цагдаагийнхан мэдээлсэн байна. Түүнийг эрэн сурвалжлах ажиллагааг өргөн цар хүрээтэй явуулж байна гэж Лос-Анжелесийн Шерифийн газрын ахмад Эндрю Мейер сэтгүүлчдэд өгүүлжээ.

Г.Бямбасүрэн