АНУ-ын Монтерей-Парк хотод сарны хуанлиар шинэ оны баяр тэмдэглэх үеэр гэмт этгээд цугласан олон руу буудаж, 10 хүний амийг хөнөөсөн талаар бид өмнө нь мэдээлсэн. Сэжигтэн хэргийн газраас зугтсан гэж цагдаагийнхан мэдээлж байсан бол ням гарагт сэжигтний цогцосыг олсон талаар АВС мэдээлжээ. 

Эх сурвалжийн мэдээлснээр, Монтерей-Парк хотод олныг хөнөөсөн сэжигтэн байсан гэж цагдаагийнхан таамагласан фургоныг шалгахад цогцос олдсон байна. Энэ нь сэжигтний цогцос бөгөөд сэжигтэн амиа хорлосон байж болзошгүй гэж цагдаагийнхан мэдээлжээ. 

Бүхээгтэй машин гэмт хэргийн газраас 20 км зайд байсан гэнэ. Цагдаагийнхан машиныг бүслэн, арын цонхыг нь хагалж дотогш нэвтрэн цогцос байгааг илрүүлсэн аж.

Энэ хэрэг нэгдүгээр сарын 22-ны өдөр, ази гаралтай хүмүүс олноор оршин суудаг Монтерей-Паркад болсон юм. Гэрчүүдийн мэдээлснээр, гэмт этгээд хагас автомат буугаар хүмүүс рүү бууджээ. Энэ хэргийн улмаас 10 хүн амиа алдаж, 10 хүн шархадсан аж. Гэмт хэргийг үйлдэх болсон сэдлийн талаарх мэдээлэл гараагүй байна.

Г.Бямбасүрэн