ОХУ Украин руу түрэмгийлснээс үүдэлтэйгээр Оросын зах зээлийг нэг мөр орхин гарсан гадаадын компаниудын тоо нийт компанийн ердөө зургаан хувийг эзэлж байгаа талаар Киевийн эдийн засгийн сургуулийн дэргэдэх судалгааны төвийн тайланд өгүүлжээ. 

"Нэгдүгээр сарын 29-ний байдлаар Оросоос 179 компани гарсан нь нийт гадаадын компанийн зургаан хувийг эзлэж байна. Сүүлийн долоо хоногт "гарсан" гэсэн ангилалд хоёр компани нэгдсэн. Одоо 1159 компани Орос дахь бизнесээ өөрчилж, зах зээлээс гарахаар бэлтгэж байна. Харин 1218 компани буюу нийт гадаадын компанийн 40 хувь нь ямар ч өөрчлөлтгүйгээр ОХУ-д ажилласан хэвээр байгаа" хэмээн судалгааны тайланд өгүүлжээ.

Судлаачдын тооцоолсноор, ОХУ-аас нэг мөр гарсан компаниуд 307,6 мянган хүнийг ажлын байраар хангаж байсан бөгөөд эдгээр компанийн жилийн нийт орлого 42,1 тэрбум долларт  хүрч байсан гэнэ.

Эдгээр компаниуд Оросын зах зээлээс гарч явахаасаа өмнө, 2021 онд 3,3  тэрбум долларын татвар төлсөн нь Оросын төсөвт бүх шатны гадаадын бизнес эрхлэгчдийн төлдөг нийт татварын 13,4 хувьтай тэнцэж байгаа аж.

Г.Бямбасүрэн