Хоёрдугаар сарын зургааны өдөр Туркэд болсон хүчтэй газар хөдлөлт хөрш Сири улсад ч ноцтой хохирол дагууллаа. Газар хоёр ч удаа хүчтэй хөдөлж, чичирхийлэл үргэлжилсний улмаас байшин барилга олноор нурж, Турк, Сирид 3800 гаруй хүн амиа алджээ.

Дэлхийн улс орнууд Турк, Сири улс руу аврагчдаа илгээж эхэллээ. Аврах ажиллагаанд оролцохоор ОХУ, АНУ, Япон, Энэтхэг, Испани, Польш зэрэг орон аврагчдаа тухайн улсууд руу илгээв.

Манай улсын цахим сүлжээний хэрэглэгчид ч аврагчдаа илгээх саналыг гаргаж байна. Тухайлбал, Ерөнхий сайд асан С.Баяр "Хэдэн сайн аврагчид явуулбал ямар вэ. Улсынхаа нэрийг гаргаг, ажил хэргийн холбоо тогтоог, аврах ажлын дэвшилтэт технологи, аргачлалд суралцаг" хэмээн жиргэжээ.