Өнгөрсөн долоо хоногт Туркэд хүчтэй газар хөдлөлт болсны улмаас олон мянган барилга байшин сүйрч, нэг хот, хороолол бүхэлдээ нурсан тохиолдол ч гарсан юм. Энэ нь барилгын норм журмыг зөрчсөнөөс үүдэлтэй хэмээн Туркийн олон нийт шүүмжлэн эрх баригчид болон барилгын салбарынхныг буруутгаж, гэм буруутнуудыг олж илрүүлэн, хариуцлага тооцохыг шаардаж байлаа. 

Улмаар Туркэд 100 гаруй барилгын гүйцэтгэгчийг эрэн сурвалжилж, заримыг нь хилийн чанад руу зугтах гэж байхад нь баривчилсан юм. Энэ удаад Адыяман мужийн Беснид нурсан зургаан барилгын гүйцэтгэгчийг баривчлан саатуулжээ. Адыяман мужийн прокурорын газрын мэдэгдсэнээр, Шюкрю Ишимтений барьсан барилгын нуранганд дарагдан 123 хүн амиа алдсан байна. 

Өмнө нь, өнгөрсөн бямба гарагт барилгын компанийн захирал, архитекторыг нисэх буудлаас баривчилсан бөгөөд түүний компанийн барьсан барилга газар хөдлөлтийн улмаас бүхэлдээ нурсан юм.

Г.Бямбасүрэн