Дэлхий дээр шинэ цэргийн сөргөлдөөн гарвал улс орнууд Украины талаар мартана, тиймээс өнөөгийн нөхцөлийг шийдэхийн тулд болзол тавилгүйгээр энхийн гэрээ байгуулах нь зөв шийдэл гэж Беларусийн Ерөнхийлөгч Александр Лукашенко мэдэгджээ.  Энэ талаар Коммерсант мэдээлсэн байна. Эх сурвалжийн мээдэлснээр Лукашенко Зеленскийд хандан улс орноо "цааш сүйрүүлэхгүй" байхыг уриалсан гэнэ.

"Энэ бол сайн, сайхан ард түмэн. Энэ дайныг зогсоох ёстой. Ганц л зам бий, тэр бол энх тайван" хэмээн Лукашенко Хятадын хэвлэлд өгсөн ярилцлагадаа онцолсон байна.

Түүний өгүүлснээр "ямар ч дайн энх тайвнаар дуусдаг" хэдий ч хичнээн хүн, "юуны төлөө амиа алдаж байгаа" гэдэгт л асуудлын гол нь байна хэмээн Александр Лукашенко онцолжээ.

"Урьдчилсан нөхцөл тавилгүйгээр энхийн гэрээ байгуулахаас өөр зам үгүй. Бүгдийг ширээний ард суугаад шийдэх ёстой. Украины цэргүүдтэй тохиролцох ёстой" хэмээн Александр Лукашенко мэдэгджээ.

Үүний зэрэгцээ Владимир Зеленскийг "муугүй хүн ч тийм ч туршлагатай биш" хэмээсэн байна. Барууны орнууд түүнийг "алга ташин, дэмжиж" байгаа ч энэ үнэндээ чин сэтгэлийн илэрхийлэл биш байж болзошгүй хэмээн Лукашенко өгүүлжээ.

"Түүнд би Михаил Сергеевич Горбачевийн талаар сануулъя. Тэр Барууны орнуудаар явж байхад бүгд л түүнийг алга ташин угтаж байсан. Гэтэл яаж дуусав? Яг л тийм хувь тавилан Зеленскийг хүлээж байна" хэмээн Александр Лукашенко өгүүлсэн байна.

Эргэн сануулахад, дайн эхэлснээс хойш дөрөв дэх өдөр нь буюу 2022 оны хоёрдугаар сарын 28-ны өдөр сөргөлдөгч талууд болох Орос, Украины хооронд хэлэлцээ эхэлж, гуравдугаар сар хүртэл хэдэнтээ хэлэлцсэн ч үр дүнд хүрэлгүй хэлэлцээ царцаж, нэг жилийн нүүрийг үзэж байна. 

Г.Бямбасүрэн