Завхан аймгийн Улиастай сумын улсын тэргүүний нэгдүгээр цэцэрлэгийн цонхоор өчигдөр хүүхэд унасан тухай бид энд мэдээлсэн. Тус цэцэрлэгийн эрхлэгч Ш.Батмөнхөөс юу болсон талаар тодрууллаа.

-Танай цэцэрлэгийн цонхоор хүүхэд унасан тухай мэдээлэл авлаа. Юу болсон юм бол?

-Хүүхэд унасан гэж хэлэхэд түвэгтэй. Багшийгаа эргэж харах хооронд хүүхэд цонхноос үсэрсэн асуудал өчигдөр гарсан.

-Хэдэн давхрын цонхноос вэ. Хүүхдийн бие гайгүй юу?

-Хоёрдугаар давхрын цонхноос үсэрсэн. Бид ээж аавыг нь дуудаж, камерын бичлэг үзүүлсэн. Хүүхэд гараа савж байгаад үсэрсэн байна. Хүүхэд бэртэж, гэмтээгүй. Бид өчигдөр эмнэлэгт очиж, хүүхдэд бүх талын үзлэг, оношлогоо хийлгэсэн. Мөн мэдрэлийн эмчид үзүүлж, зөвлөгөө аваад ажиглаж байна.

-Хэдэн настай хүүхэд вэ?

-Таван настай, манай бэлтгэл бүлэгт явдаг хүүхэд.

-Цонх нээлттэй байсан гэсэн үг үү?

-Хүүхдүүдийн аюулгүй байдлыг хангахын тулд бид бүх цонхыг хааж, цоожилдог.  

Б.Хэрлэн