Энэтхэгт нэгэн сонирхолтой шүүх хурал болжээ. Индиа Таймс сонины мэдээлснээр, тус улсын нэгэн сонины ерөнхий редактор Агра Вижай Шармагийн эхнэр Нилам Шарма 2014 оны хоёрдугаар сарын 20-ны өдөр гэртээ байхдаа бусдын гарт амиа алдсан байна.

Ерөнхий редакторын гэрт дээрэмчид орж ирэн, тонож, эхнэрийг нь хөнөөжээ. Гэвч хэргийн гэрч болохоор хүн огт байгаагүй гэнэ. Харин олон жилийн дараа гэнэт, санаанд оромгүй гэрч гарч ирснээр энэ хэрэг шийдэгджээ. 

Шармагийн гэр бүл тоть тэжээдэг байсан бөгөөд эмгэнэлт явдал болсны дараа тоть дугарахаа больж, хоол ч идэхээ больсон гэнэ. Вижай тоть нь алуурчныг харсан байж магадгүй гэдгийг ойлгоод гэмт хэрэгтэн байж болзошгүй хүмүүсийн нэрийг хэлж эхэлсэн байна. Ингээд хамаатан эрийнхээ нэрийг хэлэхэд шувуу цочирдож, "Ашу-Ашу" гэж хашгирчээ. Хамаатны эрийн нэрийг Ашу гэдэг аж.

Ингээд Вижай мөрдөн байцаагчдад хандан хамаатныг нь шалгах хүсэлт тавьжээ. Ашу тэдний гэрт олон удаа зочлож ирдэг байсан, тиймээс тоть ч түүнийг сайн мэддэг байж.

Мөрдөн байцаалтын үеэр Ашу Вижайн эхнэр Ниламыг өөр хүний хамт хөнөөсөн гэдгээ хүлээсэн байна. Ашу Вижайн гэрт байнга ирдэг байсан тул үнэт эдлэл, мөнгө хаана хадгалдгийг сайтар мэддэг байсны дээр хулгайн хэргээ сайтар төлөвлөсөн байжээ.

Алуурчныг олоход тусласан шувуу гэмт хэрэг гарснаас зургаан сарын дараа үхсэн байна. Гэхдээ хавтаст хэргийн материалд шувуу алуурчны нэрийг хэлсэн талаар байнга дурдсаар байжээ. Гэвч Энэтхэгийн хуулинд энэ нь гэм бурууг гэрчлэх нотлох баримт болохгүй тул хэрэг шийдэгдэлгүй сунжирсаар есөн жилийн дараа шийдэгдэж, алуурчинд бүх насаар нь хорих ял оноосон аж.

Г.Бямбасүрэн