Сүхбаатар аймгийн Орон нутгийн өмчийн газраас хоёр тэрбум 250 сая төгрөгөөр машин худалдан авах тендер зарласан байна. 

Тодруулбал, Сүхбаатар аймгийн 10 сумын Засаг даргын тамгын газарт машин худалдан авах юм. Нэг сум 250 сая төгрөгөөр машин худалдан авах эрхтэй гэсэн үг. Төр хэмнэхээр хууль хүртэл баталсан. Гэвч хууль дунд шатандаа энэ байдлаар хэрэгжиж байна. Өнөөдөр улс орны эдийн засаг хүндэрч, иргэдийн амжиргаа өдрөөс өдөрт муудаж байна. Эрх баригчдын зүгээс иргэдийг ажилтай орлоготой болгох төлөвлөгөө боловсруулан төсөв баталсан ч хурган дарга нар унаа сэлгэх уралдаан хийж байгаа дүр зураг үргэлжилсээр байна. 

Төсвийн жил эхэлснээс хойш аймаг сумдуудын зарлаж буй худалдан авах ажиллагааны ихэнх нь наадмын талбай засварлах ажил байсан бол өчигдрөөс эхлэн орон нутгийн төсвөөр ЖИЙП машин хөлөглөх марафон эхэллээ. Үүнийг Баянхонгор аймаг эхлүүлж Сүхбаатар аймаг ийнхүү үргэлжлүүллээ.