Украины Бахмутын төлөөх тулаан хэдэн сар үргэлжилж байна. Энэ тулаанд Оросын армийнхан төдийгүй хувийн цэргийн компани болох "Вагнер" компанийн хөлсний цэргүүд оролцож байгаа юм. 

Бахмутыг эзлэх тулаанд аль аль тал төдийлөн дорвитой үр дүн гаргаагүй өдийг хүрсэн. Энэ тулаанд оролцож байгаа Вагнер компанийн хөлсний цэргүүд зэр зэвсгийн хомстолд орсон тул хотоос ухрахаар болжээ. Энэ талаар Вагнер компанийн үүсгэн байгуулагч Евгений Пригожин мэдэгдсэн байна. 

"Бид сүүлчийн сумаа дуусгах хүртэл Бахмутад байна. Гэхдээ сум маш бага үлдсэн, нэг долоо хоног эсвэл хэдхэн өдөр л хүрэлцэх байх. Сумны хомстолыг шийдэхгүй бол бид эсвэл ухрана, эсвэл бүр тулаанаас гарна, эсвэл тэндээ үхэх байх. Ер нь л бид тэндээс цэргүүдийнхээ хэсгийг гаргахаас аргагүй болно" хэмээн Пригожин өгүүлжээ.

Түүнчлэн тэрбээр Бахмут дахь давшилтыг үргэлжлүүлэх нь зүйтэй эсэх тал дээр нэн шуурхай шийдвэр гаргахаас аргагүй болсон хэмээн онцолсон байна.

Г.бямбасүрэн