Британийн Бристоль хотод амьдардаг Тревор Хутон "тэврэх эмчилгээ" гэж нэрлэсэн үйлчилгээ үзүүлж, танихгүй хүмүүсийг тэврэн, төлбөр авдаг ажил хийгээд олон жилийн нүүрийг үзжээ. Түүний үйлчлүүлэгчид жилээс жилд нэмэгдсэн тул хувийн компани байгуулсан байна. 

The Mirror cонины мэдээлснээр, Тревор "Embrace Connections" нэртэй компани байгуулжээ. Ийм компани байгуулснаар ажлаа сурталчлахад тусалж, брэндтэй болсноор боломжит үйлчлүүлэгчдийн итгэлийг хүлээхэд хялбар болно гэж тэрбээр үзэж байгаа аж. 

Түүний тэврэлтийн үйлчилгээ цагийн 75 фунт стерлингийн үнэтэй. Түүнчлэн хүссэн хүн бүр цагийн 30 фунт стерлингийн төлбөр төлж "тэврэлтийн үдэшлэг"-т оролцох боломжтой гэнэ. Энэ үдэшлэгт ирсэн хүмүүс "аюулгүй, сайхан тааламжтай уур амьсгал дунд бэлгийн дур хүслээр биш нэгнээ хайрлан хүндэлсэн сэтгэлээр бусадтайгаа тэврэлдэх" боломжтой аж. 

Хутоны өгүүлснээр, сэтгэл заслын эмчилгээний хэвшмэл аргаас зайлсхийсэн хүмүүс голчлон түүнд ханддаг гэнэ. Бусдыг тэвэрч хайр мэдрүүлэхийг хүсдэг ч хариу сэтгэл хөдлөл хүлээж авдаггүй хүмүүс, сэтгэлзүйн гэмтлийн улмаас бусдыг хайрлан тэвэрч чадахаа больж, дахин суралцахаар ирсэн гээд олон хүн Хутоны үйлчилгээг авахаар ирдэг гэнэ.

Г.Бямбасүрэн