Дундговь аймгийн Хулд сумын Олдох баг, Өнч гэдэг газарт суудлын автомашин замын хажуу руу онхолдож, жолооч нь автомашины төмөр хийцэд хавчуулагдан нас баржээ. Энэ тухай дуудлага 05 дугаар сарын 23-ны өдрийн 18:20 цагт онцгой байдлын байгууллагад ирсэн байна.

Өмнөговь аймгийн Цогтцэций сумаас Улаанбаатар хотын чиглэлд иргэн Б /40 настай, эрэгтэй/-ын жолоодож явсан Ниссан Ванетта загварын суудлын автомашин замын хажуу руу онхолдож, иргэн  Б автомашины төмөр хийцэд хавчуулагдан нас барсан байна. Тус аймгийн Онцгой байдлын газрын Хулд сум дахь Эрэн хайх, аврах бүлгийн алба хаагчид цогцсыг гаргаж, аймгийн Цагдаагийн газарт шилжүүлэн өгчээ.