Ял эдлэж байхдаа Оросын армид элссэн хөлсний цэргүүд фронтоос зугтах явдал удаа дараа гарч байгаа талаар The Moscow Times сонин мэдээлжээ. 

Эх сурвалжийн мэдээлснээр, энэ удаад Бүгд Найрамдах Донецк Ард Улсын нутаг дэвсгэр дээр байрлаж байсан цэргийн ангиас, өмнө нь хоригдол байсан долоон цэрэг зугтсан байна. Тэд бүгд зэвсэгтэйгээр зугтсан бөгөөд оргосных нь дараахан Брянка орчмоос гурвыг нь олсон байна. Зугтсан цэргүүд кафед согтуу байсныг олж саатуулжээ. Харин өөр нэг цэрэг бууж өгөхөөр шийдсэн тул хамт оргож байсан хүмүүс нь түүнийг буудсан байна. 

Одоо үлдсэн гурван цэргийг эрэн хайх ажлыг Ростов мужид явуулж байгаа гэж хууль сахиулах байгууллагаас авсан эх сурвалжтайгаар ТАСС агентлаг мэдээлжээ. Энэ нхэрэг гарахаас өмнөхөн өөр нэг цэргийн ангиас 39 зэвсэглэсэн цэрэг оргосон бөгөөд тэд бүгд өмнө нь хоригдож байсан, гэрээгээр алба хаахаар фронт дээр очсон байсан гэнэ. 

Г.Бямбасүрэн