Дани улс Украинд зориулсан ээлжит тусламжийнхаа хүрээнд 2,5 тэрбум долларын цэргийн тусламж үзүүлэхээр зэхэж байгаа гэнэ. Энэ талаар тус улсын Ерөнхий сайд Метте Фредериксен мэдэгдсэнийг "Эрх чөлөө" радио мэдээлжээ.

Данийн Ерөнхий сайдын мэдэгдсэнээр, 2,5 тэрбум долларын хэмжээтэй ээлжит тусламж нь энэ он болон ирэх жил Украинд зориужл зэвсэг худалдан авахад зарцуулагдах аж. Дани улс 2023 онд Украинд цэрэг, иргэний тусламж үзүүлэх санг гуравдугаар сард байгуулж байлаа. Энэ сан нэг тэрбум долларын хөрөнгөтэй аж. Үүн дээр энэ онд нэмэлтээр нэг тэрбум доллар, ирэх онд 1,5 тэрбум долларын хөрөнгө оруулахаар болжээ.

Энэ шийдвэрийг НАТО-ийн Ерөнхий нарийн бичгийн дарга Йенс Столтенберг хойд нутгуудаар айлчлал хийхээс өмнө гаргасан байна. Столтенберг энэ оны есдүгээр сард албан тушаалаа орхих бөгөөд Данийн Ерөнхий сайд Метте Фредирексен НАТО-д түүний оронд очиж магадгүй гэсэн яриа гарсан юм.

Г.Бямбасүрэн