Сүүлийн үед Оросын олон газарт дроны халдлагууд үйлдэгдсээр байна. Мягмар гарагт Москва хот дроны халдлагад өртсөн бол өнгөрсөн шөнө Краснодар дахь газрын тос боловсруулах үйлдвэр рүү дроноор довтолжээ. 

Краснодар хязгаарын захирагч  Вениамин Кондратьевын мэдээлснээр, Краснодар хязгаар дахь Афипийн газрын тос боловсруулах үйлдвэр рүү дроноор халдсаны улмаас мазут нэрэх төхөөрөмж шатсан байна. Улмаар 100 кв.м газар тархсан ч унтраасан, галын улмаас хүн бэртэж гэмтээгүй гэнэ. 

Өмнө нь энэ сарын эхээр ч газрын тосны үйлдвэрүүд рүү дроноор халдсан тохиолдол хэдэнтээ гарч байлаа. Тухайн үед дроны довтолгооны улмаас гал гарсан ч их нутаг хамраагүй, үндсэн үйл ажиллагаанд нөлөөлөхгүй гэж эрх баригчид мэдэгдэж байв. 

Афипийн газрын тосны үйлдвэр нь жилд 6,25 сая тонн газрын тос боловсруулах хүчин чадалтай. Энэ үйлдвэр дээр дизель түлш, хийн бензин, газойль, мазут, хүхэр үйлдвэрлэдэг юм. 

Г.Бямбасүрэн