Газрын тос экспортлогч орнууд багтдаг ОПЕК-ийн 13 орон болон Орос зэрэг 10 түнш орон 2024 онд газрын тосны олборлолтын түвшнийг бууруулахаар тохиролцжээ. Энэ талаар DW агентлаг мэдээлсэн байна. 

Эх сурвалжийн мэдээлснээр, ОПЕК+ орнууд 2024 онд хоногт 40,46 сая баррель олборлохоор тохиролцсон бөгөөд энэ нь өмнөх хэлэлцээрт тусгасан хэмжээнээс 1,393 сая баррелиар бага үзүүлэлт юм. Түүнчлэн Саудын Араб долоодугаар сард газрын тос олборлолтоо нэмэлтээр хоногт нэг сая баррелиар буулгахаар болсон байна.

Орос улс ч мөн 2024 оны 12 дугаар сарын сүүл хүртэл хоногт олборлох газрын тосны хэмжээгээ 500 мянган баррелиар бууруулахаар болжээ. Дэлхийн зах зээл дээр газрын тосны эрэлт болон үнэ буурсаар байгаа юм. 2022 оны зургадугаар сард Брент маркийн газрын тос баррель нь 120 доллар байсан бол 2023 оны зургадугаар сард ойролцоогоор 76 доллар болжээ. 

Г.Бямбасүрэн