Энэ долоо хоногийн эхээс л Орос, Украины фронт дээр тулаан идэвхтэй өрнөж байгаа ч пүрэв гарагт болсон үйл явдал нь Запорожьед Украины сөрөх давшилт эхэлсэн гэдгийг харуулж байна гэж Америк, Украины эх сурвалжуудаас авсан мэдээлэлтэйгээр барууны хэвлэлүүд дамжуулжээ. 

Түүнчлэн, энэ бүс нутгийн Оросын хяналтын захиргааны тэргүүн Владимир Рогов РИА Новости агентлагт мэдээлэл өгөхдөө Украины цэргүүд Запорожье мужид өргөн цар хүрээтэй сөрөх давшилт эхлүүлсэн, Запорожийн хэсэгт их хэмжээний цэрэг, технк татан төвлөрүүлсэн хэмээн онцолжээ. Мөн чухамхүү Запорожье нь сөрөх давшилтын гол чиглэл болсон талаар пүрэв гарагт АНУ-ын өндөр албан тушаалтан "Нью-Йорк Таймс" сонинд ярьсан байна. 

Үүний зэрэгцээ, Германы Bild сэтгүүлийн цэргийн тоймч Юлиан Рёпке Запорожье мужид Украины Зэвсэгт хүчний давшилт эхэлсэн гэдгийг батлаж байгаа юм. Тэрбээр байлдааны үйл ажиллагаа өрнөж буй бүс нутгаас авсан гэрэл зураг болон дүрс бичлэг дээр үндэслэн дүгнэлт гаргажээ. Цэргийн тоймчийн өгүүлснээр Орехов бүсээс Пологи, Токъмак, Васильевка, Мелитополь хотууд руу цохилт өгсөн байна. 

Мөн Владимигр Зеленскийн ойрын хүрээллийн эх сурвалж сөрөх давшилт эхэлсэн гэдгийг баталжээ. Сүүлийн үеийн мэдээллээр, Запорожье хотоос өмнөд зүгт ширүүн тулаан өрнөж байгаа гэнэ. Украины сайтар бэлтгэгдсэн ангиуд сүүлийн өдрүүдэд стратегийн чжхал чиглэлүүд рүү ойртсон гэж АВС агентлаг мэдээлжээ.

Г.Бямбасүрэн