Цалингаа нэмүүлэхийг шаардсан ерөнхий боловсролын 87 сургууль, 61 цэцэрлэгийн  багш нар 2012 оны нэгдүгээр сарын 1-нээс эхэлж ажил хаялт зарлаж байсан ч хөдөлмөр, нийгмийн гурван талт хэлэлцээр хийж, Засгийн газарт энэ сарын 8-наас эхлэн төрийн албан хаагчдийн цалинг 80 мянган төгрөгөөр нэмэх санал хүргүүлсэн учраас түр хугацаагаар завсарласан юм. Хэрэв Засгийн газраас товлосон хугацаандаа  цалин нэмэхгүй бол багш нар баярынхаа өдрөөр  ажил хаяна гэсэн  анхааруулгыг өгч буй. Энэ талаар МҮЭХ-ны Монголын багш нарын ҮЭХ-ны дарга Ж.Батзоригоос тодрууллаа. -Багш нар хэзээнээс ажил хаях вэ? -Яг одоогийн байдлаар бид Засгийн газраас гарах шийдвэрийг хүлээлж байна. Багш нар долоо хоног ажил хаясны дүнд гурван талт хэлэлцээрийг зохион байгуулж Төсвийн тухай хуульд нэмэлт өөрчлөлт оруулсныг та бүхэн мэдэж байгаа. Үүний дүнд цалинг хоёрдугаар сарын 1-нээс 80 мянган төгрөгөөр, тавдугаарс арын 1-нээс 23 хувиар нэмэхээр болсон. Гэтэл цалин нэмэх Сангийн яам ажлын хэсэг гарган ажиллаж байгаа учраас энэ сарын 8-аас өмнө судалгаагаа хийж дуусаад УИХ-ын чуулганд өргөн барина гэсэн. Хэрэв амласан хугацаандаа цалин нэмэхгүй бол бол багш нар ажил хаяна, жагсана. -Гурван талд хэлэлцээрээр зөвшилцөлд хүрсэн юм биш үү? -  Гурван талт хэлэлцээрийн дүнд нэмэлт өөрчлөлт оруулсан учраас эндээс гарсан шийдвэрийг биелүүлэх байх гэж хүлээж байна. Шатахууны үнийн өсөлт, цалин тэтгэвэр нэмэх асуудлыг ч чуулган завсарлахаас өмнө шийдвэрлэнэ байх гэсэн хүлээлттэй байна.