УИХ-ын чуулганы нэгдсэн хуралдаанаар Тавантолгойн нүүрсний ордыг ашиглах зарим асуудлын тухай УИХ-ын 39 дүгээр тогтоолд нэмэлт, өөрчлөлт оруулах тухай УИХ-ын тогтоолын төслүүдийн хэлэлцэж, баталлаа.
Дээрх төслүүдэд зааснаар “Эрдэнэс тавантолгой” компанийн хувьцаанаас Монгол Улсын иргэд 20 хувийн хувьцаа эзэмших болж байгаа юм. Мөн үндэсний аж ахуйн нэгжид тус компанийн хувьцаанаас 10 хувийг нь нэрлэсэн үнээр нь арилжаалахаар тусгасан билээ. Ингэхдээ Хүний хөгжлийн сангаас нэг сая төгрөгөө сургалтын төлбөр хэлбэрээр авсан оюутнуудад хувьцаа олдохгүй. Мөн ахмад настан, хөгжлийн бэрхшээлтэй иргэд хувь хишгээ нэг сая төгрөгөөр бэлнээр авсан нөхцөлд дээрх 1072 ширхэг хувьцаа олдохгүй болж буй юм.
Тиймээс хэлэлцүүлгийн шатанд энэ асуудал нэлээд хөндөгдөж байна. Мөн “Эрдэнэс тавантолгой” компани хэр чадамжтай байна вэ гэдэг асуудлыг ч УИХ-ын гишүүн Ц.Сэдванчиг хөндлөө.
Тэрбээр хэлэхдээ “Эрдэнэс тавантолгой компани нь 250 сая ам.долларыг урьдчилж зээлэн түүнийгээ иргэддээ тараагаад өгсөн. Ийм нөхцөлд “Эрдэнэс тавантолгой” компанийн хувьцааг олон улсын хөрөнгийн зах зээлд гаргахад үнэ цэнийг нь бууруулах юм биш биз” гэж байлаа.
Түүнчлэн төрийн өмчит аж ахуйн нэгжийн ажил явдаггүй, харин хувийн хэвшлийнх гялтагнаад байдаг. Үүний тод жишээ бол Том тавантолгой компанийн дэргэд үйл ажиллагаа явуулж буй “Энержи ресурс”, “жижиг Тавантолгой”, “Дайцүкц” зэрэг компанийн ажлаас харж болно. Энэ нь Засгийн газрын зүгээс төрийн өмчит компанийн ажлыг хэргээр явуулахгүй байсаар унагах чиглэл рүү явуулж байна гэж хардахад хүргэж буйгаа нуусангүй.
УИХ-ын Эдийн засгийн байнгын хорооны дарга Р.Будын хэлснээр бол “Эрдэнэс тавантолгой” компани таван лиценз эзэмшдэг. Дээр нь иргэдийн 50 хувь нь шахам хувьцааныхаа оронд бэлэн мөнгө авах сонирхолтой байгаа. Тиймээс “Эрдэнэс тавантолгой” компанийн хувьцааг гадаад зах зээлд гаргахад асуудалгүй. Компанийнх нь өөрийн үнэ цэнэ 6.1 тэрбум ам.долларын үнээр үнэлэгдэж байгаа тухай холбогдох албаныхан өгсөн гэв.
Хэлэлцүүлгийг төгсгөлд УИХ-ын гишүүн Л.Гантөмөр “Төсөл хэрэгжих хугацааг өнөөдрөөс хэмээн тогтооё. Цагаан сарын өмнө нэг сая төгрөгөө авах сонирхолтой иргэд байгаа учраас ийм горимын санал гаргаад санал хураая” гэсэн боловч танхимд дэмжлэг авсангүй.
Уг хэлэлцүүлгийн өмнө Боловсролын тухай хуульд өөрчлөлт оруулах тухай хуулийн төслийн анхны хэлэлцүүлгийг хийж дуусган эцсийн хэлэлцүүлэгт бэлтгүүлэхээр Нийгмийн бодлого, боловсрол, соёл, шинжлэх ухааны байнгын хороонд шилжүүлсэн юм.
Б.Саруул