БОАЖ-ын сайд Д.Цогтбаатар нийслэлийн бүх дүүргийн засаг дарга нарыг өнөөдөр хүлээн авч уулзлаа.  Энэ үеэр Улаанбаатар хотын нийт нутаг дэвсгэрийн хэмжээнд байгаа эзэн хариуцагч нь тодорхойгүй барилгын болон ахуйн хур хог хаягдлыг ирэх зургаадугаар 15-ны дотор бүрэн цэвэрлүүлэх талаар нийслэлийн есөн дүүргийн засаг дарга нартай гэрээ байгуулав.   БОАЖЯ салбарын хэмжээндээ 2012 оныг “Агаарын бохирдол, орчны доройтолтой тэмцэх жил” болгон зарласан. Жилийн ажлын хүрээнд хүний эрүүл, аюулгүй орчинд амьдрах нөхцөлийг сайжруулах зорилгоор засаг дарга нартай гэрээ байгуулж, үйл ажиллагааны санхүүжилтийг БОАЖЯ-наас бүрэн хариуцах юм.   Уулзалтад БОАЖЯ-ны Төрийн нарийн бичгийн дарга Н.Батсуурь, нийслэлийн засаг дарга бөгөөд Улаанбаатар хотын захирагч Г.Мөнхбаяр, БОАЖЯ-ны нэгжийн удирдлагууд оролцон нийслэлийн хүрээлэн буй орчныг сайжруулахад хамтран ажиллах, харилцан үүрэг хүлээх талаар санал солилцлоо.   П.Наран