Монголчууд “Бадарчин явсан газар балагтай, батгана ниссэн газар өттэй” хэмээн ярьдаг. Тэгвэл сүүлийн үед энэ хэлц үгийг “Монголчууд явсан газар балагтай” хэмээн өөрчилхөд хилсдэхгүй болжээ. Сүүлийн үед гадаад явж галуу шувууны мах зооглох болсон эрхэмүүд хар тамхи, хүн амины хэрэг, хулгай, биеэ үнэлэх, хүний наймаа зэрэг гэмт хэрэгт ихээр холбогдох болсон юм. Гэсэн ч Монгол улсын Төр засаг хэрэгт холбогдож буй иргэддээ ямар нэгэн анхаарал тавьж улсын зүгээс арга хэмжээ авдаггүй, зөнд нь хаядаг. Тиймээс гадаадад гарч "Хар од" болж байгаа хүмүүсийн тоо өдрөөс өдөрт өсөн нэмэгдсээр байна. Зөвхөн энэ он гарснаас хойш амиа хорлох оролдлого хийсэн, гадаадад осолд орж амиа алдсан, нэгнийгээ хөнөөсөн, гадаадын иргэнийг хутгалсан, биеэ үнэлсэн, хар тамхи тээвэрлэсэн гээд цөөхөн хэдэн Монголчууд гадаадад хэрэгт холбогдсоор байна. 3000 воны үнэтэй Монгол бүсгүй Солонгост “од” болов Солонгос улсын нэр нөлөө бүхий улсын их дээд сургуулиудад суралцахаар ирсэн гадаадын оюутнууд, ялангуяа Хятад болон Монгол оюутан охидууд биеэ үнэлж байгаа талаар Солонгосын цагдаагийнхан мэдээлэл авсан байна. Тиймээс Сөүл хотын Юнгсан дүүргийн цагдаагийн газрынхан шөнийн клуб болон VIP салонуудад шалгалт хийжээ. Зөвхөн уржигдар гэхэд иргэн Пак болон түүний  гэргий Гуан нарын ажиллуулдаг рүүм салоноос тус улсын их дээд сургуульд суралцдаг 5 Хятад, 1 Монгол оюутныг  саатуулаад байгаа аж. Солонгос хэлний анхан шатны мэдлэгтэй гадаад оюутнуудыг, цагт 15 мянган воны хөлстэйгээр бааранд зөөгчөөр ажилд авна гэсэн зарлалыг интэрнэтэд тавьж, цагийн ажил хийхээр ирсэн охидуудад VIP салонд ажиллавал илүү их мөнгө олж чадна хэмээн санал тавьж уг саналыг хүлээж авсан охидууд ийнхүү биеэ үнэлдэг байсан нь тодорхой болжээ. Мөн тэдэнд дэлхийд алдартай гоо сайхны брэндийн бүтээгдэхүүнийг биеэ үнэлбэл хямдхан өгнө гэж хэлсэн үгэнд итгэж ажилласан охидууд ч байгаа ажээ.Үнэхээр энд биеэ үнэлж ажилласан хятад оюутанд гадаадын гоо сайхны барааг 10 хувь хямдхан үнээр өгснийг,  тухайн оюутан үнээр нь найздаа зарж байсан ч явдал болж байжээ. Монгол оюутан охин  нэг удаадаа 300 мянган воноор биеэ үнэлж, олсон мөнгөнийхөө талыг өөртөө авахаас гадна 2 цагт 20 мянган вон авч рүүм салонд ирсэн Солонгосчуудад ширээний хүүхэн болж үйлчилдэг байсан байна. Одоогоор  баригдаад байгаа дээрх 6 оюутан бүсгүйтэй хамт буудалд хоносон Солонгос эрэгтэйчүүдийг тэдний буудлын мөнгөө төлсөн картын дугаараар эрж олон хариуцлагад татах ажил мөн эхлээд байгаа юм байна. Эрээний Монголчууд Хэдэн жилийн өмнө хэдэн навтгар шавар байшин, шар тоосноос өөр юу ч үгүй байсан тосгон өнөөдөр Монгол улсын нийслэлээс ч илүү хөгжилтэй болсон. Хэдхэн жилийн дотор өнгөө өөрчилсөн Эрээн хот сайныг ч, саарыг ч зэрэг зэрэг хөгжүүлсэн. Гэхдээ саар талыг нь Монголчууд хөгжүүлж байгаа гэхэд их хатуудахгүй. Өнөөдөр Эрээн хотод биеэ үнэлж байгаа бүсгүйчүүдийн ихэнх нь Монгол бүсгүйчүүд. Улаанбаатараас Эрээнийг зорин очиж биеэ үнэлж байгаа бүсгүйчүүдийн дийлэх нь 16-23 насны залуусбайна. Худалдагдсан охид Гадаадад өндөр цалинтай ажилд зуучилж өгнө гэх зарын золиос болсон охидууд ихэвчлэн Малайз, БНХАУ, Макао, БНСУ-д худалдагдаж биеэ хүчээр үнэлдэг. Өөрөөр хэлбэл тэд Монголоос “ирсэн” зардалаа төлөхийн тулд биеэ үнэлэхээс өөр аргагүй дарамтанд ордог байна. Манай улсад хамгийн анх 2000 онд ОХУ-ын иргэн М нь нэр бүхий 5 эмэгтэйг “Югослав улсад бүжигчнээр ажиллуулна” гэж хуурч мэхлэн хил давуулан худалдсан хэрэг бүртгэгдсэнээр хүн худалдаалах гэмт хэрэг “дэлгэрч” эхэлсэн түүхтэй. Бэлгийн мөлжлөгийн зорилгоор худалдагдаж байгаа охидоос 41 хохирогчийг эх оронд нь буцаан ирүүлсэн байна. Зөвхөн 2009 онд ГХЯ, цагдаагийн байгууллага, ТББ-ууд хамтран хүн худалдаалах гэмт хэргийн хохирогч болсон нийт 16 эмэгтэйг, үүнд Турк улсаас 3, БНХАУ-аас 12, Малайз улсаас 1 эмэгтэйг эх оронд нь эргүүлэн авчирчээ. Охид, бүсгүйчүүд ихэвчлэн гадаадын чинээлэг хүнтэй гэрлэх, эсвэл гадаадад гарч ямар нэгэн ажил хөдөлмөр эрхлэх, гадаадад суралцахын тулд ямар нэгэн баталгаагүй этгээдэд хандах, ингэснээрээ энэ төрлийн гэмт хэргийн хохирогч золиос болох нөхцөл бүрддэг. Араб залууг Шведэд “дээрэлхэв” “Ice top” хамтлагаас өрх тусгаарлан багын анд Манлайтайгаа нийлж “S and I” хамтлагийг үүсгэн байгуулж нэлээдгүй амжилттай  уран бүтээл туурвиж байсан Бадгаа  буюу /С.Бат-Отгон/ одоогоос таван жилийн өмнө танхайн хэргээр ял эдлэж байсныг түүний хамаатан садан найз нөхөд хөөцөлдөж байж суллуулан Швед явуулсан. Гэтэл Швед улсад сурахаар очсон тэрээр визнийхээ асуудлыг шийдүүлэхээр хүлээх хугацаандаа хүний аминд хүрч Шведийн шоронд 13 жилийг өнгөрөөхөөр болсон. Тэрээр хэрэг гардаг өдөр гудамжинд сагс тоглож байсан бөгөөд хэдэн араб залуус бөөнөөрөө дээрэлхэн зодож яс үндсээр нь доромжилж улмаар зодохоор дайрчээ. Тиймээс өөрийгөө хамгаалж дайрч ирсэн залуусыг хоёрыг нь хутгалсан ба хутгалуулсан залуус эмнэлэгт хүргэгдсэн ч 18 настай Ребел Шариф шархаа даалгүй нас баржээ. Шведийн шүүхээс Бадгаагийн хэргийг аргагүй хамгаалалт гэж үзсэн боловч мэс хэрэглэсэн гэх шалтгаанаар 13 жилийн ял өгсөн юм. Хар тамхи Монголчуудыг Хятадад цөлж байна Монголчуудтай холбоотой хар тамхины хэрэг манай урд хөршид ихээр гарах болов. Түүнчлэн хар тамхи, мансууруулах бодистой хамаарах гэмт хэргийн эзэн холбогдогчид хилийн чанадаас буюу тодруулбал урд хөршөөс өвс, кокейн зэргийг зөөвөрлөх чиглэлтэй байдаг аж. Грамм нь хэдэн мянган ам.доллараар үнэлэгддэг “Цагаан тахал” Монголчуудыг Хятадад цөлөх шалтгаан болж байна. Хар тамхи наймаалагчид Хятад улсад үйлдэл дээрээ баригдах явдал сүүлийн жилүүдэд эрс нэмэгдээд байгаа юм. Одоогоор БНХАУ-д хар тамхи худалдсан, зөөвөрлөсөн, хадгалсан гэх хэрэгт холбогдсон манай улсын 5-7 иргэн байгаа аж. Гэтэл сар хүрэхгүйн өмнө Хятад Хонконгийн хилээр хар тамхи авч гарахыг завдсан манай улсын долоон залуу баривчлагджээ. Тэдний гурав нь Хонконгийн хилд саатуулагдсан бол дөрөв нь БНХАУ-ын гаалийнханд баригдсан аж. Хар тамхины эсрэг хуулийн заалт маш хатуу үйлчилдэг Хятадад баригдсан дөрвөн залууд цаазаар авах ял оноосон бол Хонконгд байгаа залууст 2.5 жилийн ял оноосон аж. Тэдгээр залуус хар тамхи зөөвөрлөхөд нэгдсэн ч хоёр хэсэг болж явсан бөгөөд хоёр өөр хууль, өөр орны хил дээр баригдсан гээд тоочоод байвал олон хэрэг дурьдагдана.  Өнгөрсөн хугацаанд хар тамхи зөөвөрлөж яваад баригдсан Монголчуудын тоо БНХАУ-ын хуулийн байгуулагын ажиглалтаар өссөн дүр зурагтай байна.