-Олимпод та бүхэн их том амлалт өгсөн байна? -32 жил тасраад байгаа чөлөөт бөхийнхний олимпийн медалийн буухиаг залгуулах хариуцлагатай үүрэг даалгавар авчихаад байна. Бид өнгөрсөн жил ард түмэндээ “Монголын чөлөөт бөхийн тамирчид Лондоны олимпоос гурван медаль хүртэнэ. Үүний нэг нь алт байна” гэж амласан. Энэ том зорилгынхоо төлөө зүтгэж байна. Зорилгоо тодорхойлоод зүтгэсэн биднийг Монголын залуучууд, ялангуяа бидний дэмжиж ажиллаж буй бизнес, нийгмийн төлөөлөл болсон олон сайхан залуу түлхэж байгаа. Энэ олон хүний итгэл найдвар, ард түмнийхээ чөлөөтийнхөн медаль хүртчихээсэй гэсэн хүслийг биелүүлэхийн төлөө өдөр шөнөгүй зүтгэж байна. Манай тамирчид бэлтгэл сургуулилалтаа сайн хийж байгаа, МЧБХ-ноос дэлхийн стандартад нийцсэн эм бэлдмэлээр хангаж байгаа. Бид амжилт гаргана гэдэгтээ бүрэн итгэлтэй байна. -Монголын чөлөөт бөхийн багт тамирчдын олимп хүртэлх хөтөлбөрийг сонирхоё? -Бэлтгэл хийж байгаад наймдугаар сарын 1-нд Болгарт очно. 1700 метрийн өндөрт тав хонож, цагийн бүст дасан зохицно. Лондонд 6-нд очиж, маргааш нь тамирчдын түрүүч жингээ үзүүлнэ. Монголын чөлөөт бөхийн тамирчдын хувьд олимпийн наадам наймдугаар сарын 8-нд эхэлнэ. Энэ өдөр Бээжингийн олимпийн нээлт болж байсан болохоор би их бэлгэшээж байгаа. -Манайхан найман эрх авсан нь олимпийн наадамд эрх авч оролцдог болсноос хойшхи хамгийн өндөр үзүүлэлт. Гэхдээ МЧБХ-ноос зорьж байсанд арай хүрсэнгүй? -11 эрх авч, бүтэн багаараа зодоглох боломж байсан. Эрэгтэйчүүдийн 60, 66, 96 кг-ын жингийн эрхийг урдуураа таслуулсан. Бид дотоод боломж бололцоогоо үнэлэх хэрэгтэй. Үүн дээрээ дүгнэлт хийгээд, зорилгоо зөв тодорхойлоход олдохгүй эрх, медаль гэж байхгүй. Дэлхий нэг хавтгай. Бидэнд үзэл бодлын зөрүү байхгүй. Нүд, ухааны ялгаа арилчихсан байхад медаль хүртэнэ гэсэн хатуу зорилготой зүтгэж, шаардлагыг ч өндөр тавьж байна. Зөв зохион байгуулалтад орсон байхад амжилт гарахгүй яах вэ. -Олимпод оролцох бүрэлдэхүүнийг зарласан. Тамирчдад ямар шалгуур тавьсан бэ? -Эрэгтэйчүүдийн 55, эмэгтэйчүүдийн 63 кг-ын жинд асуудалтай байсан. Амжилт, гадны хэчнээн бөхтэй барилдсан, эхний 20 байрт жагсч байгаа бөхийн хэдийг нь ялах, Лондонд очоод дасан зохицох чадвар, бэлтгэл сургуулилалтад оролцож байгаа хүрээлэл гээд олон зүйлийг харж үзсэн. Ингээд 55 кг-ын жинд гавьяат тамирчин Б.Наранбаатарыг барилдуулах болсон. Эргээд залуучуудаа дэмжсэнгүй гэсэн асуулт гарч ирнэ. Яг өнөөдөр Б.Наранбаатарыг ялах залуу бөх байхгүй байна. Би залуучуудаа дэмжих бодолтой байсан ч МЧБХ-ны Удирдах зөвлөл, Мэргэжлийн зөвлөлд сууж байгаа хүмүүсийн дийлэнх олонх нь Б.Наранбаатарыг дэмжсэн. Шударга үнэн шийдвэр гэж үүнийг л хэлнэ. -63 кг-ын тухайд? -Олон улсын тэмцээнд оролцсон байдал, биоритм, мөчлөг, хүчний үзүүлэлт, арга техник, амжилт гээд олон зүйлийг харсан. Эмэгтэй хүнд мөчлөгийн асуудал чухал байдаг. Энэ онд С.Батцэцэг О.Насанбурмааг “Mongolia Open” болон Монголын бүх ард түмний спортын XIII их наадамд илт давуу ялсан. Энэ хоёрын хэнийг нь олимпод оролцуулах тухай санал хураахад тав, таваар тэнцсэн. Үүнийг МЧБХ-ны ерөнхийлөгч Л.Чинбат хагалж, С.Батцэцэгийг олимпийн наадамд явуулах болсон. Гэхдээ 63 кг-д О.Насанбурмааг авч явна. Байдал яаж эргэхийг бид мэдэхгүй. Энэ бол манай хамгийн гол найдвар тавьж, олимпийн аваргатай болно гэж зорьж байгаа жин. -Манайд хүнд жинд бэлтгэл хангагчийн асуудал байнга тулгардаг. Харин энэ удаа Ж.Чулуунбатыг бэлтгэлийг хангуулахаар Болгараас хоёр тамирчин авчирчээ? -Монголчууд анх Болгараас чөлөөт бөхийн арга барилыг авсан. Райко Петров гэж манай алдарт аваргуудын багш байсныг та бүхэн мэдэж байгаа. Бид уламжлалт харилцаагаа сэргээж, Болгар руу хандаж байна. Улс хоорондын харилцаа сайн, эдийн засгийн хувьд ч ойролцоо. Иймээс Болгарын хоёр тамирчны сарын хөдөлмөр хөлсийг нь өгөөд авчирсан. Би өөрөө 120 кг-д барилдаж байсан болохоор Ж.Чулуунбатдаа их анхаарч байгаа.