Монгол Улсын Засгийн Газраас зам тээврийн ослыг буурлах чиглэлээр хэд хэдэн ажлыг эхлүүлж байсан ч ослын тоо жилээс жилд өссөөр байгаа юм. Замын цагдаагийн газраас гаргасан судалгаагаар зам тээврийн ослын талаас илүү хувийг буруу талдаа жолооны хүрдтэй тээврийн хэрэгсэлтэй жолооч үлйддэг болохыг тогтоосон аж. Тиймээс Засгийн газраас гаргасан замын хөдөлгөөний аюулгүй байдлыг хангах стратегид 2015 он гэхэд буруу талдаа жолооны хүрдтэй тээврийн хэрэгслийн хүрдний байрлалыг солих, гэрлийн тусгалыг өөрчлөх чиглэлээр үйл ажиллагаа явуулдаг жижиг, дунд үйлдвэрийг дэмжих замаар буруу талдаа жолооны хүрдтэй автомашины тоог цөөрүүлнэ гээд энэ үүргийг  Нийслэлийн Засаг даргын Тамгын газарт өгсөн билээ. Энэхүү үүргийн дагуу Нийслэлийн Засаг даргын Тамгын газраас хэрэгжүүлэхээр шат дараатай арга хэмжээ авахаар төлөвлөсний нэг нь буруу талдаа жолооны хүрдтэй авто машины хөдөлгөөнийг долоо хоногийн Ням гаригт хязгаарлах асуудал. Энэ асуудлаар иргэдээс санал асуулга явуулж байгаа бол өчигдөр интернэт хэрэглэгчдийн дунд буюу твиттер хуудас, фэйсбуук, мессенжерээр өнөөдөр 12.00 цагаас дуут дохиогоо хангинуулж, 10 минутын турш эсэргүүцлээ илэрхийлэхийг уриалсан аж. Мөн машингүй нэгэн бол шүгэлдэж ч болох гэнэ. Засгийн газрын шийдвэрээр хотын даргын гаргах шийдвэрт жолооч нарын энэхүү эсэргүүцэл нөлөөлөх эсэхийг мэдэхгүй ч нэгэнт худалдаад авсан машинаа солих боломж алга байна. Тиймээс замын хөдөлгөөний дүрмийг зөв баримталж, хэвшихэд анхаарах нь илүү чухал хэмээн жолооч нар үзэж байгаа аж. П.Наран