Австралийн Викториа мужийн Балларат хотын ойролцоогоос мэргэжлийн бус хувиараа хайгуул хийдэг нэгэн хүн 5.5 кг жинтэй цул алтан гулдмай олжээ. Тэрбээр ердөө гар аргаар ашигладаг металл хайгчийн тусламжтайгаар энэ алтыг олсон байна. Лхагва гаригт алтыг олсон бөгөөд газрын гүнээс ердөө 60 см-ийн дор байжээ. Өнөөгийн алтны ханшаар бодож үзэхэд тус алтан гулдмай 315 мянган ам.долларын үнэ хүрч байгаа. Балларат хотын ойролцоогоос сүүлийн арван жилд алт олдох болсон тухай нутгийн иргэд ярьж байгаа. Гэхдээ ийм томоороо олдсон анхны тохиолдол нь энэ ажээ. Үүнээс өмнө хамгийн томдоо 2.8 кг жинтэй цул алт олж байсан хэмээн Балларат хотын алтны дэлгүүрийн худалдагч хэлж байна. Алтыг олсон эрхэм тэр даруйдаа дүрс бичлэг хийж Youtube сайтад байрлуулжээ. Тэрээр маш олон жилийг бичил аргаар алт  хайхад зориулсан бөгөөд ихэнхдээ жижиг хэмжээгээр л олборлож байжээ. Э.Мөнхнасан