Нийслэл хотын хэмжээнд сүүлийн 10 гаруй жил барилгажилт эрчимжиж, хууль бус газар олголт, түүнийгээ дагасан зөвшөөрөлгүй барилга барих асуудал нэмэгдэх болсон нь хот төлөвлөлтийн тулгамдсан асуудал болж буй. Иргэдийн тав тухтай, аюулгүй амьдралын нөхцөл бололцоог хангах үүднээс шат дараатай олон арга хэмжээ авч байгаагийн нэг нь нийслэл хотод зөвшөөрөлгүй барилга байгууламж барих ажлыг зогсоож эхэлсэн. Баянзүрх дүүргийн Засаг даргын Тамгын газраас нийтийн эзэмшлийн зам талбайд хууль бусаар барилга байгууламж барихгүй байх, барьсан тохиолдолд хуулийн дагуу арга хэмжээ авч эхэлжээ. Тухайлбал, Баянзүрх дүүргийн VI хорооны нутаг дэвсгэр “Шинэ сонголт” хүнсний дэлгүүрийн урд талд “Монкор-Интернэшнл” ХХК-ийн захиалгаар барьж буй загварын барилгын үйл ажиллагаанд Нийслэлийн Мэргэжлийн хяналтын газрын Барилга техникийн хяналтын улсын байцаагч хяналт шалгалт хийж, барилга угсралтын ажил эхлэх үргэлжлүүлэх зөвшөөрөл аваагүй болохыг үндэслэн үйл ажиллагааг түр хугацаагаар зогсоох тухай акт үйлдсэн аж. Гэвч улсын байцаагчийн актыг зөрчиж барилга угсралтын үйл ажиллагаа үргэлжлүүлэн явуулсан тул Баянзүрх дүүргийн Засаг даргын Тамгын газар, дүүргийн Мэргэжлийн хяналтын хэлтэс, дүүргийн Цагдаагийн хоёрдугаар тасаг хамтран энэ сарын 16-ны өдөр барилга угсралтын үйл ажиллагааг бүхэлд нь зогсоосон байна. П.Наран