Нийслэлийн Чингэлтэй дүүрэг “Эрүүл орчин” аяныг энэ сарын 18-аас ирэх гуравдугаар сарын 18-ны хооронд зохион байгуулахаар болжээ. “Эрүүл орчин” аян маргааш 11.00 цагт эхлэх бөгөөд Тасганы овоо, Баянбүрдийн тойрог замын хоёр хажуу, Гэсэр сүмийн уулзвар, 4 замын уулзвараас Гэсэр сүмийн уулзвар хүртэлх замын зүүн тал, Бишрэлт их дэлгүүр, 25 суваг телевиз, 5 дугаар сургуулийн зүүн талаас Гэрэл төв зэрэг нийтийн эзэмшлийн зам талбайн цас мөсийг цэвэрлэх юм байна. Тус аянд дүүргийн нутаг дэвсгэрт оршин сууж байгаа нийт иргэд, аж ахуйн нэгж, байгууллага, хороод, төрийн болон төрийн бус байгууллага, олон улсын байгууллагын ажилтан, албан хаагчид батлагдсан хуваарийн дагуу ойр орчмынхоо 50 м газрын цас мөсийг арилгах, нийтийн эзэмшлийн зам талбайг цэвэрлэх юм. Аяны хүрээнд дүүргийн гэр болон орон сууцны хороолол, байгууллага, аж ахуйн нэгжийн болон нийтийн эзэмшлийн гудамж талбайн цас мөсний хальтиргаа гулгааг арилгах, хог хаягдлыг цэвэрлэн нийт нутаг дэвсгэрийн хэмжээнд аюулгүй зорчих, иргэдийн ая тухтай орчинд амьдрах нөхцлийг бүрдүүлэх зорилгоор тус аяныг зохион байгуулж байна. П.Наран