Дээд Радын депутат Евгений Щербанийн амь насыг бүрэлгэсэн хэргийг мөрдөн шалгах ажил дууслаа гэж Украины ерөнхий прокурор Виктор Пшонка  мэдээлэл хийхдээ мэдэгдэв. Мөрдөн байцаагчдын үзэж байгаагаар, гэмт хэргийн захиалагч нь ерөнхий сайд асан Юлия Тимошенко, Павел Лазаренко нар байжээ. “Эхлээд Лазаренко гэмт бүлгийнхэнд 500 мянган ам. доллар өгснийг мөрдөн байцаах байгууллага тогтоолоо” гэж Пшонка мэдэгдэв.  Харин Юлия Тимошенко нэлээд их, тодруулвал 2,3 сая ам. доллар өгчээ. Лазаренко, Тимошенко хоёр ялт бүлэглэлийн толгойлогч нар, түүнчлэн гардан гүйцэтгэгч нартай биечлэн уулзаж байсныг ерөнхий прокурорын газрын тэргүүн дурдсан байна. “Энэ аллагын шалтгаан нь юу байв? Ашиг хөөсөн, бизнесийн ашиг сонирхол байжээ” гэж Пшонка тодруулан тайлбарлажээ. Түүний хэлснээс үзвэл,  маргааны гол сэдэв нь санхүүгийн “Атон” корпорацийн тэргүүн Тимошенкотой хамтран ажиллахыг хүсээгүй гэх яриа байдаг бөгөөд тэгэхэд “Украины эрчим хүчний нэгдсэн систем”-ийн тэргүүн нь Лазаренко байжээ. Москвагаас Донецкийн нисэх буудалд газардсан Дээд радын депутатыг онгоцны шатаар бууж явахад нь буудан алсан байна. Мөн түүний гэргий, бас хэд хэдэн хүн алагджээ. Гэмт хэргийг гардан үйлдэгчдийг олсон юм. Энэ хүн амины хэрэгт Тимошенко холбогдолтой тухай мэдээлэл надад бий гэж Украины ерөнхий прокурорын орлогч Ренат Кузьмин 2011 оны наймдугаар сард мэдэгдэж байжээ. С.Золбоо