Хятадын нам төрийн бодлогын эсэргүүцсэн нэгэн Түвд залуу зулын гол болж дахин үймээн дэгдлээ. Энэ удаад өөрийгөө шатаасан эрийн найзууд болон түүнийг дэмжигч хятадуудын эсрэг үзэлтнүүд болох мянга гаруй хүнийг баривчилсан байна. Өнгөрсөн оноос эхлэн Түвдэд зулын гол болох үзэгдэл өмнөх жилүүдээс хэд дахин нэмэгдсэн. Ялангуяа өнгөрөгч арваннэгдүгээр сард Хятадын Коммунист намын хурал болж удирдлагууд солигдсон цагаас эхлэн ийм аргаар эсэргүүцлээ илэрхийлэх үзэгдэл нэмэгдэж байна. Зөвхөн өөрсдийгөө шатаагаад зогсохгүй оюутнууд ч гэсэн үзэл бодлоо илэрхийлж хэд хэдэн удаа жагсаал цуглаан хийсэн. Зулын гол болох энэ үзэгдлийг Хятадын удирдлагууд хүн амины хэрэгт тооцож байгаа. Тиймээс өөрийгөө золиослох энэ үзэгдлийг багасна хэмээн найдаж байгаа юм. Хамгийн сүүлийн үеийн мэдээллээр 2009 оноос хойш өөрийгөө шатаасан 100 гаруй тохиолдол гарснаас 80 гаруй нь сүүлийн нэг жилийн дотор гарчээ. Хэрэг явдал Хятадын Ганьсу, Чинхай аймгуудад дийлэнхдээ гарч байна. Э.Мөнхнасан