Улаанбаатар хотын утаа хэрээс хэтэрч Утаанбаатар болсоор удаж байна. Энэ л ажлын хүрээнд 2008 онд хамтарсан Засгийн газрыг байгуулагдсаны дараа дээрх асуудлыг хөндөж улмаар Хоёрдугаар цахилгаан станцын буурин дээр 2010 онд шингэн шилний үйлдвэрийг гурван тэрбум төгрөгөөр босгож, дэргэд нь утаагүй түлш буюу хагас коксжсон нүүрсийг боловсруулах үйлдвэр байгуулагдсан билээ. Утаагүй түлшний үйлдвэр барих тендерийн 17 тэрбум төгрөг ямар ч асуудалгүй “Аморе интернэшнл” ХХК-ийн ерөнхий захирал Г.Баатарсүрэнгийн халаасанд орох нь тэр. Тухайн үед ямар ч тендер шалгаруулалгүйгээр тус компанид үлэмж хэмжээний мөнгийг өгсөний цаад нууц ноёнтон нь Засгийн газрын Хэрэг эрхлэх газрын дарга асан Ч.Хүрэлбаатар байжээ. Тэрбээр УИХ-ын экс гишүүн “Алимаа” хочит Ц.Батбаяртай энэхүү тендерийн асуудлаас болж улайм цайм УИХ-ын чуулганы танхимд “би чи, гахай, нохой” дээрээ тулж байсан юм. Ийнхүү хэрэлдэж байсны цаад учир нь ердөө л экс гишүүн Ц.Батбаяр тэрхүү 17 тэрбумыг өөрийн талын компанид өгөх санаа байж. Гэтэл төсвийн тэр их мөнгийг залгисан “Аморе интернэшнл”-ийн захирал Г.Баатарсүрэн гэгч ОХУ-ын нэр бүхий компанийн лабораторийн шатанд явж байсан төслийг шуудхан туршилт хийх маягаар Монголд авчирч улсын мөнгөөр тоглосон ч амжилтад хүрсэнгүй. Өдгөө утаагүй түлшний үйлдвэрийн зуух нь бохирдож, хар утаа, хөө тортог хаях болсон тул энэхүү төсөл тэр чигээрээ орвонгоороо эргэхэд хүрэв. Хамгийн инээдэмтэй бөгөөд эмгэнэлтэй зүйл нь уг үйлдвэрийн хатаагч нь Оросынх, бутлагч, хэвлэгч, холигч зэрэг төхөөрөмж нь Хятад улсад үйлдвэрлэгдсэн ийм л нэгэн эвлүүлдэг тоглоом шиг үйлдвэр өнөөдөр бидний халааснаас гарсан 17 тэрбумаар баригдаж, агаарт замхран одохоос наахнуур байгаа юм. Эх сурвалж www.wikimon.mn