Мөн дэлхийн хаана ч байхгүй санал Ардчилсан намаас оруулж ирсэнд гайхаж байгаагаа хэллээ.  Мөн төрийн нууцын жагсаалтанд өөрчлөлт оруулах талаар өмнөх чуулганы хуралдаанаар хэлэлцэхэд МАН-аас завсарлага авсан. Хувь хүний нууц болон тухайн хүний эрхийг хамгаалах асуудалд ингэж хандаж болохгүй. Тиймээс намын зүгээс маш нарийн нухацтай авч хэлэлцэх хэрэгтэй гэсэн байр суурьтай байна” гэлээ.  Мөн МАН-ынхан энэ долоо хоногийн чуулганы хуралдаанд оны өмнө УИХ-ын гишүүн С.Бямбацогтын асуулга тавьсан  “Төрийн албан хаагчдыг ажлаас нь чөлөөлөх болсон шалтгааны” талаар мэдээлэл сонсохоор болсон байна.

Мөн МАН-ын бүлэг хоёр долоо хоногт нэг удаа Засгийн газрын гишүүдийг бүлгийн хуралдаа урьж, мэдээлэл сонсож байхаар болсон байна. Улс оронд болж буй тодорхой асуудлыг сөрөг хүчний байр сууринаас хөндөн тавьж, асуудлыг шийдэх болно гэдгээ МАН-ын бүлгийн дарга Н.Энхболд хэлсэн юм.

Харин МАН-ын бүлгийн дэд дарга С.Бямбацогт “Шинэчлэлийн Засгийн газар байгуулагдаад  хагас жил болж байна. Их л аятайхан зүйл ярьж, хэлж байгаа. Гэвч хэлж, ярьсан зүйл нь үр дүнд хүрч байна уу гэдгийг дүгнэх цаг болсон. Засгийн газраас утаа, агаарын бохирдлоор тодорхой ажлуудыг төлөвлөж хэрэгжүүлсэн гэж байгаа. Гэвч үр дүн байхгүй. Мах, бензины үнэ нэмэгдсээр л байна. Яагаад үүн дээр дорвитой зохицуулалт хийхгүй байгааг гайхаж байна. Мөн  малчиддаа туслах аяныг дэмжиж ажиллана” хэмээлээ. Түүнчлэн тэрбээр “Байнгын хороонд АН-аас гурван гишүүн суугаад, МАН-аас нэгхэн гишүүн сууж байх жишээтэй.

Үүнийг засаж залруулах шаардлагатай байна. Мөн өнгөрсөн долоо хоногийн чуулганы хуралдаан дээр Ц.Оюунгэрэл гишүүн зургаан гишүүний өмнөөс кноп дарж харагдсан. УИХ-ын гишүүдийн ирцийг бүрдүүлж байх тал дээр хяналт тавьж ажиллана. Бас УИХ-ын чуулганаар бидний эхэлж өргөн барьсан хуулийг хэлэлцэхгүй, дараа нь өргөн баригдсан хуулийг хэлэлцэж байна. Энэ мэтчилэн АН хүч түрэмгийлж, хэт улайрч байна” гэсэн юм.

Н.Түвшин