ОБЕГ-ын харьяа Аврах тусгай ангийн Тэсэрч дэлбэрэх бодисыг аюулгүй болгох бүлгийн дарга Н.Очирбат өчигдөр гэр бүлийнхнийхээ хамт хэвлэлийнхэнд хандсан юм. Тэрээр өнгөрсөн есдүгээр сарын 07-ны өдөр ангийн захирагч А.Батмөнхийн тушаалаар нийслэлийн Баянзүрх дүүрэг, Бөхийн өргөөний баруун урд байрлах лөрвөн давхар “Эрин" эмнэлгийн барилга дээр ажил үүргээ гүйцэтгэж явах үед ньхажуу талын “Баганат өргөө"  ХХК-ийн барьж буй барилгын 12 давхраас тулгуур төмөр унаж дух, нүүрний хэсэгт оносноос тархи болон нүүр хацрын яс бяцран маш хүнд гэмтэл аван гэмтлийн эмнэлэгт хүргэгдсэн байна. Улмаар гурав хоног ухаангүй байж байгаад есдүгээр сарын 11-ний өдөр хагалгаанд орсон байна.

Эмч нарын ачаар түүний бие дээрдсэн ч эд, эс сэргээх эмчилгээг гадаадад хийлгэх шаардлагатай хэмээн зөвлөсний дагуу өнгөрсөн аравдугаар сард Бээжингийн Цэргийн төв эмнэлэгт эмчлүүлжээ. Одоогоор түүний баруун тархи хоёр газарт нөхөлт хийж дух ба хацар, хоёр нүдний аяга битүү хадалттай \төмөртэй \ зүүн нүд бүрэн хараагүй, баруун нүд тархины гэмтлээс болж хараа муудаж гэрэл ялгах төдий, үнэрлэх мэдрэхүй байхгүй,  хамрын ясны хугаралт хэвээрээ байгаа бөгөөд хөдөлмөрийн чадвараа 65 хувь алдсан гэсэн дүгнэлтийг Мэргэжлийн хяналтаас гаргасан байна. Хэвлэлийн хурлын үеэр хохирогч Н.Очирбат “Гэмтэл авсныхаа дараа таван сарын туршид Бээжин, Энэтхэгт хүнээс мөнгө төгрөг зээлж, эмчилгээ хийлгэсэн боловч төдийлөн үр дүнд хүрээгүй.

Энэ хугацаанд осол гарсан “Баганат-Өргөө” компанид хуулийн байгууллага ямар нэгэн хариуцлага тооцоогүй. Уг нь энэ осол гарахаас өмнө манай гэр залуу гэр бүлтэй адилхан ажилтай амьдралтай байсан. Гэвч намайг осолд орсны дараа миний биеийн байдлаас болж, эхнэр маань ажлаасаа гарсан. Мөн долоон сартай жирэмсэн хоёр дахь хүүхдээ тээж байгаа юм.  Хэдийгээр ОБЕГ-ын хамт олон маань миний цалинг бүрэн бүтнээр нь өгч байгаа ч, 20 гаруй сая төгрөгийн өрөнд орсон учраас сэтгэл санааны дарамтад байна. Дээрх барилгын компани бидний эрүүл мэнд, сэтгэл санааны хохирлыг арилгаж чадахгүй ч, хөрөнгө мөнгөний туслалцаа үзүүлээсэй хэмээн хүсэж байна” гэсэн юм. Одоогийн байдлаар “Баганат өргөө” барилгын компани, “Эрин” эмнэлгийн холбогдох ажилтныг Баянзүрхийн цагдаагийн хэлтэс шалгаж байгаа аж.

 

Д.Цэцэг