УИХ-ын 2012 оны сонгуульд Баянзүрх дүүрэгт  МАН-аас нэр дэвшиж ялалт байгуулсан УИХ-ын гишүүн Д.Арвиныг тангараг өргүүлсэнтэй  холбоотой Сонгуулийн ерөнхий хорооны шийдвэрийг хууль зөрчсөн гэсэн  гомдлыг хэсэг  иргэд Үндсэн цэцэд гаргажээ. Тиймээс цэцээс уг гомдлыг хянаж үзээд  маргаан үүсгэн үндэслэлтэй гэж үзсэн байна. Тиймээс  эл маргааныг маргааныг хянан шийдвэрлэх Үндсэн хуулийн цэцийн дунд суудлын хуралдаан энэ оны ирэх хоёрдугаар сарын 1-ний өдөр болох тов гарчээ.

 Улсын Их Хурлын сонгуулийн 22 дугаар тойрогт дахин санал хураалт явуулахдаа нийт сонгогчийн  50-аас дээш хувь нь оролцоогүй байхад тухайн санал хураалтыг хүчинтэйд тооцон Монгол Ардын Намаас нэр дэвшигч Д.Арвинг Улсын Их Хурлын гишүүнээр сонгогдсонд тооцож, Монгол Улсын Ерөнхийлөгчид айлтгаж, Улсын Их Хуралд өргөн мэдүүлсэн Сонгуулийн ерөнхий хорооны дээрх тогтоол нь Монгол Улсын Үндсэн хуулийн Нэгдүгээр зүйлийн 2,  Хорин нэгдүгээр зүйлийн 2 дахь заалтыг зөрчсөн  хэмээн үзэж ийнхүү нэр бүхий иргэн Үндсэн хуулийн цэцэд хандсан   юм байна.

Сонгуульд МАН-аас сонгогдсон хэр нь Ардчилсан намд гишүүнээр элссэн УИХ-ын гишүүн Д.Арвин   намын гишүүнчлэлээ сольсон нь иргэдийн анхаарлыг татсан. Тэрбээр энэхүү үйлдлээ  тайлбарлахдаа “Төрийн бодлого чинээлэг иргэд рүү чиглэж байна.

Өнөөдөр ядуус ажлын байргүй, амьдарч байгаа орчин нь цэцэрлэг, сургууль байхгүй, худаг ус, цахилгаан гэрэл ч үгүй байна. Ийм дүр төрх нийслэлийн захын хорооллоор дүүрэн. Тодруулж хэлбэл, 190 мянга гаруй иргэн өнөөдөр маш хүнд нөхцөлд ажиллаж, амьдарч байна. Энэ хүмүүст зориулсан бодлого хэрэгжүүлэх саналыг би өмнө нь МАН-ын гишүүн байхдаа олон удаа тавьж ирсэн. Тухайлбал, Хөдөлмөр эрхлэх хуулийг ядуу иргэддээ чиглүүлье гэж хуулийн төсөл санаачлан УИХ-д оруулж байхад ажлын хэсгийн ахлагч өөрчилж байлаа.

Нийгмийн хамгаалал, хөдөлмөрийн яам гэхээсээ илүү Хөдөлмөрийн яамыг тусад нь байгуулах хэрэгтэйг тухайн үеийн Ерөнхий сайд болон бусад хүмүүст хэлж байсан боловч миний санал дэмжигдээгүй. Монгол Улсад хөдөлмөрийн бодлого хэрэгтэй, Улаанбаатарын агаарын бохирдлыг бууруулах талаар би өмнө нь Нийгмийн бодлого, боловсрол, соёл шинжлэх ухааны байнгын хорооны дарга байхдаа олон асуудлыг дэвшүүлж, оруулж байлаа. Гэвч эдгээр асуудлыг гүйцэтгэх засаглал манай МАН-ын бодлогоор хэрэгжүүлэхгүй байсанд миний сэтгэл өвдөж байсан.

Ардчилсан нам МАН хоёр нэг нь зүүний, нөгөө нь барууны нам боловч өнгөрсөн дөрвөн жилд хамтарч ажиллахдаа ямар ч үзэл баримтлалын зөрчил гаргаагүй. Монгол Улсад хэт барууны, хэт зүүний үзэл хэрэггүй гэдгийг амьдрал харуулсан учраас би энэ сонголтыг хийсэн" гэсэн хариултыг өгч байв.

 

У.Хаш