Хилийн чанадад зорчиж буй монгол иргэд хайхрамжгүй байдлаар паспорт бичиг баримтаа гээгдүүлж үрэгдүүлэх, хулгайд алдах тохиолдол сүүлийн үед олноор бүртгэгдэж байгаа тул бичиг баримт, мөнгө эд зүйлсээ сонор сэрэмжтэй авч явахыг Гадаад харилцааны яамнаас сэрэмжлүүлж байна. Тухайлбал, энэ сарын 18-нд Эрээн хотод таксигаар зорчиж явсан Монгол Улсын зургаан иргэн 128 мянган юань бэлнээр авч явсан хоёр цүнхээ арын тээшинд мартаж буужээ. Тэд энэ тухай Эрээн хотын Эрүүгийн цагдаагийн газар гомдол гаргасан ч мөнгөө мартаж буусан таксиныхаа улсын дугаарыг санахгүй, жолоочийн гадаад төрхийг сайн тодорхойлж чадахгүй байсан нь хэргийн илрүүлтэд багагүй хүндрэл учруулжээ. Гэсэн ч тус хотын цагдаагийнхан мэргэжлийн өндөр түвшинд, шуурхай ажилласны үр дүнд гурав хоногийн дотор эзэн холбогдогчыг нь олж тогтоон, мөнгийг бүрэн бүтнээр нь буцаан олгожээ. Арга хэмжээг гардан зохион байгуулсан Эрүүгийн цагдаагийн ажилтан, удирдлагад Монгол Улсаас Эрээн хотод суугаа Консулын Газраас талархлын бичиг гардуулсан байна хэмээн Гадаад харилцааны яамнаас мэдээллээ.