УИХ дахь МАН-ын бүлгийнхэн өнөөдрийн хуралдаанд Үйлдвэр, хөдөө аж ахуйн сайд Х.Баттулгыг хүнсний бүтээгдэхүүн тэр дундаа мах, гурилын үнийн өсөлт болон өвөлжилтийн байдлын талаар мэдээлэл өгөхийг  хүсч албан бичиг илгээжээ.

Гэвч  Х.Баттулга сайд  орон нутагт томилолттой  явж байгаа тул  Үйлдвэр хөдөө аж ахуйн дэд сайд, газрын дарга нар нь ирж бүлэг дээр мэдээлэл хийсэн байна.  МАН-ын гишүүдийн хэлж буйгаар “Иргэдэд 21 мянган төгрөгийг тараахад бараа бүтээгдэхүүний үнэ нэмэгдсэн гэдэг. 21 мянган төгрөгийг тараахад жилдээ 500 тэрбум төгрөг болдог байсан.

Гэтэл 780 тэрбум төгрөгийг аж ахуй нэгжид өгсөн хэрнээ мах, гурилын чинь үнэ яагаад өсөөд байгаа юм бэ” гэхэд салбарын яамныхан “780 тэрбум төгрөгөөс 240 нь манай яаманд хамаарч байгаа. Мах, гурилын үнийн өсөлтийг барих дэд хөтөлбөр үр дүнгээ өгч байгаа. Инфляци тогтворжиж, огцом өсөлт байхгүй болсон” гэсэн тайлбарыг өгсөн байна. 

Н.Бүжин