Монголын ирээдүйн эзэд болсон хэсэг залуучуудын төлөөлөл халуун сэтгэлийн тусламжаа хэрэгтэй хүнд нь зориулж, нийгмийн амьдралд гар бие оролцож явна. Тодруулбал, өнгөрсөн оны аравдугаар сард “Дулаахан өвөлжье I” аяныг өрнүүлсэн “Хамтын халуун сэтгэл” залуусын нэгдлээс “Дулаахан өвөлжье II” аяныг өнгөрөгч ням гаригт зохион байгуулжээ. Тус аяны хүрээнд эзэндээ хэрэггүй болсон ч бусдад хэрэгтэй хувцаснуудыг тараасан аж. Энэхүү халуун сэтгэлийн аянд дэлхийн өнцөг булан бүрт ажиллаж амьдарч байгаа монголчууд болон монголдоо амьдарч буй сайхан сэтгэлт хүмүүс оролцсон байна. Халуун сэтгэлт залуус ням гаригийн өглөө 09 цагт Төв номын сангийн урдаас хөдлөн Улаанчулуутын болон Биокомбинатын хогийн цэгт очиж, тэнд ажиллаж амьдардаг хүмүүст тусламжийн гараа сунгажээ. Үүний дараа Улиастайн эцэст байрлах “Заяа үжин” нийгэмлэгийн н.Тамарагийн халамж анхааралд байдаг 25 өрхийн иргэдэд тусламжаа хүргэжээ. Ингэхдээ тэр хавийн амьдралын боломж тааруу иргэдэд ч тусалсан аж. Хамгийн сүүлд нь Алтан овоогийн оршуулгын газрын ойролцоо амьдардаг хүмүүст халуун сутгэлийн тусламжаа хүргэсэн байна. Залуус энэхүү аяныг зарлаад сайхан сэтгэлт хүмүүсээс ирсэн хувцас, хунарыг нас хүйс, хэмжээ загвараар нь ангилсан байсан гэнэ. Нэг багц буюу нэг уутанд дотуур өмд, цамц, малгай ороолт, куртка, оймс, бээлий, футволк зэргийг багтаасан байжээ. Энэ удаагийн аяны хүрээнд 1000 гаруй хүнийг дулаан хувцастай болгохын зэрэгцээ тэдэнд халуун аарц, сүүтэй цайгаар дайлсан аж. “Хамтын халуун сэтгэл” залуусын нэгдлийнхэн “Бидэнд туршлага дутахаас сэтгэл дутахгүй” хэмээн  хэлэх дуртай юм билээ. Энэ удаагийн “Дулаахан өвөлжье II” аяныг  Гаахүүгийн Батзаяа гэх залуу ахлан хэрэгжүүлсэн бөгөөд тусламж хүргэх аянд 20 гаруй автомашин, 100 гаруй залуучууд оролцсон юм. “Хэний зүрх бусдын төлөө цохилно, тэр хүн үнэхээр агуу “ гэж нэгэн суут хүн хэлсэн байдаг. Бусдын төлөө цохилох зүрхтэй байна гэдэг энэ орчлонд төрсөн хүн бүхний хамгийн эрхэм чанар билээ. Сайн үйлс дэлгэрэх болтугай. http://youtu.be/UVaPpHRGI-A П.Наран