Монгол Улсын Батлан хамгаалах яам, Зэвсэгт хүчний хэрэгцээнд зориулан БНХАУ-ын БХЯ-наас буцалтгүй тусламж болгон авто техник,  архив болон эмнэлгийн зориулалттай эд хэрэгслийг хүлээлгэн өгөх ёслол өнөөдөр БХЯ-нд боллоо. Энэхүү ёслолд УИХ, Засгийн газрын гишүүн, Батлан хамгаалахын сайд Д.Бат-Эрдэнэ, БХЯ-ны Төрийн нарийн бичгийн дарга, бригадын генерал З.Болдбаатар болон БХЯ, ЗХЖШ-ын зарим удирдах бүрэлдэхүүн оролцов. Монгол Улсын БХЯ, БНХАУ-ын БХЯ хооронд 2012 онд байгуулсан протоколын хүрээнд БНХАУ-аас буцалтгүй тусламжаар хүн тээврийн 18 автобус, архивын нягтруулсан шүүгээ, тавилга 289 ширхэг, эмнэлгийн сургалт, дадлагын хэрэгсэл дөрвөн иж бүрдлийг гардуулав. Нийт 10.0 сая юань буюу хоёр тэрбум гаруй төгрөгийн үнэ бүхий эдгээр буцалтгүй тусламжийн техник хэрэгслийг ЗХЖШ, БХИС, “Монгол цэрэг-жуулчин” ТӨҮГ, “Бага баян-Энхийн төлөө цогцолбор” төв, Батлан хамгаалах, хууль сахиулах алба хаагчдын нэгдсэн эмнэлэг, “Бөртэ” ТӨҮГ, Батлан хамгаалахын төв архив, Барилга захиалагчийн алба, Монгол цэргийн музей зэрэг БХЯ-ны харьяа есөн байгууллагад хүлээлгэн өгсөн юм. 18, 30, 45 хүний суудалтай хүн тээврийн автобусууд нь 2013 онд үйлдвэрлэгдсэн. Архивын нягтруулсан шүүгээ, тавилга нь ЗХЖШ, БХИС, Батлан хамгаалахын төв архив, Монгол цэргийн музейд архивын зориулалтаар ашиглагдана. ЗХЖШ-т цэргийн алба хаагчид, энхийг сахиулагчдын сургалт дадлагын хэрэгцээнд ашиглагдах эмнэлгийн сургалт дадлагын иж бүрдэлд бүтэн муляж, артерийн судас тарилгын дадлагын гар, дуслын шингэн тарих дадлагын гар зэрэг зүйлс багтаж байгаа аж.   П.Наран