Монгол Улсын хэмжээнд сүүлийн жилүүдэд орчин үеийн стандартад нийцсэн хувийн эмнэлэг цөөнгүй нэмэгдсэн. Харин улсын эмнэлэгүүдэд засвар үйлчилгээ хийж, будаж янзлахаас өөрөөр шинэчлэл хийгдээгүй. Гэхдээ Эрүүл мэндийн сайд асан С.Ламбаа үүрэгт ажлынхаа хүрээнд нийслэлд төдийгүй улсын хэмжээнд шинээр хэд хэдэн эмнэлэг барих ажлыг эхлүүлсэн билээ. Тэгвэл өнөөдөр түүний эхлүүлсэн ажлын нэг болох Нэгдүгээр амаржих газрын өргөтгөл болох 150 ортой  шинэ төрөх эмнэлэг ашиглалтад ороход бэлэн болж, өнөөдөр түлхүүр гардуулах ёслол боллоо.  Энэхүү ёслолын ажиллагаанд Эрүүл мэндийн сайд Н.Удвал, нийслэлийн Засаг дарга Э.Бат-Үүл, тус эмнэлгийн барилгын хөрөнгө оруулагч болох "Сентерра Гоулд" компанийн удирдлагууд, Канадын элчин сайд ноён Грегори Гөүлдхок, Эрүүл мэндийн сайд асан С.Ламбаа, эмнэлгийн барилгын гүйцэтгэгч “Цаст констракшн” ХХК-ний хамт олон, I төрөхийн эмч, эмнэлгийн ажилчид болон албаны бусад төлөөлөл оролцлоо. Одоогоос хоёр жилийн өмнө буюу 2010 онд”Сентерра Гоулд" корпорацийн хөрөнгө оруулалтаар “Цаст” констракшн нэгдүгээр төрөхийн өргөтгөлийг барьж эхэлсэн билээ. 150 ортой энэхүү өргөтгөл 2011 онд ашиглалтад орох байсан ч хойшилсоор өнөөдөр ийнхүү ашиглалтад орж байгаа аж.  Арван тэрбум төгрөгийн санхүүжилтээр боссон тус эмнэлэг эмэгтэйчүүдийн зориулалттай 100, нярайн эмчилгээний 50 ортой, 1,4 тэрбум орчим төгрөгийн эмчилгээ, оношлогоо, мэс заслын тоног төхөөрөмжөөр тоноглогдсон бөгөөд эмчлүүлэгч тус бүр хүчилтөрөгчийн аппараттай холбогдох боломжтой гэнэ. Нээлтийн үеэр “Сентерра гоулд” корпорацийн Үйлдвэрлэл эрхэлсэн Ерөнхий захирал Гордон Рейд: -Монголын ирээдүй болсон бяцхан хүүхдүүд энэ эмнэлэгт эрүүл аюулгүй орчин төрөх боломжоор хангагдаж байгаад баяртай байна. Хүүхэд эрүүл саруул төрөх нь энэ амьдралын юутай ч зүйрлэшгүй үнэтэй зүйл байдаг. Энэхүү эмнэлгийн өргөтгөл нь Сентерра Гоулд корпораци, Эрүүл мэндийн яам, Улаанбаатар хотын захиргаа болон “Цаст Констракшн” ХХК-ийн хамтын ажиллагааны үр дүн юм гэв. ЭМЯ-ны Сайд Н.Удвал шинэ өргөтгөлийн түлхүүрийг гардан аваад Монголын эрүүл мэндийн салбарт үнэтэй хувь нэмэр оруулсан “Сентерра гоулд” корпораци, болон “Цаст Групп” ХХК-ны хамт олонд талархал илэрхийлсэн. Тэрбээр шинэ эмнэлгийн түлхүүрийг Нийслэлийн Засаг дарга бөгөөд Улаанбаатар хотын захирагч Э.Бат-Үүлд гардуулан өгөхдөө “ Эрүүл мэндийн салбарын төдийгүй нийслэлийн хэмжээнд хамгийн орчин үеийн эмнэлгийн энхүү түлхүүрийг таньд гардуулж өгье. Таны гарт нийслэлийн эх үрсийн эрүүл мэндийн аюулгүй байдал, чанар шилжлээ” хэмээсэн юм. Харин Нийслэлийн Засаг дарга бөгөөд Улаанбаатар хотын захирагч Э.Бат-Үүл түлхүүрийг гардан авахдаа “Би II төрөх эмнэлэгт төрсөн. Ухаан орсноос хойш миний мэдэхээр 53 жил боллоо. Тэр эмнэлэг маань нэг ч өөрчлөгдөөгүй байсаар л байгаа. Харин энэхүү эмнэлэг нь шинэ цагийн анхны эмнэлэг болох юм. Түүнээс гадна миний бие маш чухал үүрэг хүлээлээ. Нийслэлийн эх үрсийн эрүүл мэндийг сахин хамгаал гэж байна. Энэ үүрэг нь орчин үеийн чанар стандартад нийсэн дараа дараагийн эмнэлгүүдийг ашиглалтад ороход анхаарлаа хандуулаарай гэсэн утга гэж ойлголоо” гэв. ЭМЯ-ны сайд асан С.Ламбаагаас шинэ өргөтгөлийн талаарх сэтгэгдлийг нь сонсоход: -Энэ бол анх удаа гадаадын хөрөнгө оруулалтаар Монголын эх хүүхдийн төлөө хийж буй том ажил гэж онцолж хэлмээр байна. Арван жил Монголын алтыг ашигласныхаа төлөө “Бороо Гоулд” ХХК-наас оруулсан хөрөнгө оруулалт гэж болно. Бид нэлээн шахалт үзүүлж байж энэхүү хөрөнгийг авсан. Үүний үр дүнд маш сайхан эмнэлэгтэй боллоо. Эхлүүлсэн ажлынхаа үр дүнг үзэж байгаадаа баяртай байна гэсэн юм. Эмнэлэг өвчтөнүүдээ хүлээж авах бэлтгэл ажлуудаа хангаж байгаа бөгөөд одоогийн байдлаар хүний нөөцийн асуудал хүндрэлтэй байгаа талаар Нэгдүгээр амаржих газрын дарга Ж.Энхбаяр хэлж байлаа. Тодруулбал, ЭМЯ-наас 200 орон тооны төсөв баталсан бөгөөд одоогийн байдлаар эх барих эмэгтэйчүүдийн эмч л ирээд байгаа юм байна. Харин ерөнхий мэргэжлийн буюу нярайн эмч, эмгэг судлаач эмч, тархвар судлаач эмч, эмзүйч, лабораторийн эмч, мэс заслын сувилагч, эрчимт эмчилгээний эмч, зарим нэг туслах ажилтнуудын орон тоо сул байгаа аж. Ямартай ч олон улсын жишигт нийцсэн уг амаржих газар энэ оны эхний хагаст үйл ажиллагаагаа эхлэхээр төлөвлөсөн байна. П.Наран Б.Мөнх-Эрдэнэ