Цагаан сарын баяр дөхөж байгаатай холбогдуулж Улаанбаатар хотын Ерөнхий менежер Б. Бадрал нийслэлчүүддээ хандаж уриалга гаргажээ. Монголчуудын 2000 жилийн түүхтэй энэхүү баярыг өрх гэр бүр эдийн засгийн зардал чирэгдэл багатайгаар, цэвэр цэмцгэр, аюулгүй орчинд соёлтой, зөв зохистойгоор тэмдэглэн өнгөрүүлэх явдал мөн хэмээн уриалгаа эхэлжээ. Б. Бадрал  “Монголчууд  сар шинийн баяраа угтаж гэр байшин, хашаа хороогоо цэвэрлэн тоос шороогоо гөвөн шинэ оноо цэвэр цэмцгэр угтдаг уламжлалтай ард түмэн билээ. Энэхүү уламжлалаа даган өрх гэр бүр, байгууллага аж ахуйн нэгж болгон гадна дотно цэвэрлэгээгээ хийж, хог шороо, цас мөсөө цэвэрлэн шинэ оноо угтацгаая” гэдэг санааг уриалгадаа тод тусгасан байна. Зөвхөн гэр орон, хашаа хороо, орц хонгил доторх хог шороогоо цэвэрлээд зогсохгүй гудамж талбай орчин тойрноо хогноос нь салгаж өөр өнгө төрхтэйгөөр өөдрөг сар шинээ угтацгаая  гэсэн цаад агуулгыг нь дэмжиж, хэрэгжүүлэхээс өөр аргагүй. Сар шинийн баяраар амардаггүй хүмүүсийн тоонд  замын цагдаа нар зүй ёсоор орно. Замын хөдөлгөөнд маш эмх замбараагүй байдал үүсч, улмаар осол аваар нэмэгдэх эрсдэлтэй учраас тэд өдөр шөнөгүй ажилладаг. Хотын ерөнхий менежер энэ асуудлын хүрээнд замын хөдөлгөөний ачаалал, түгжрэл саатлыг бууруулах үүднээс аж ахуйн нэгж байгууллага, иргэд  бүхэн замын хөдөлгөөнд соёлтой боловсон оролцож, бие биеэ хүндэтгэн, хууль дүрмээ сахин хэрэгжүүлэх нь энэ баярын нэгэн утга учир гэдгийг сануулжээ. Мөн өнөөгийн даяаршлын эрин үед ахмадуудынхаа амрыг эрэн золгож, хотол олноороо цуглахдаа ахмадууд нь хүн бүрт  бараа бүтээгдэхүүнээр гарын бэлэг тараах бус, ураг төрөл, зочин гийчиндээ идээ будаанаасаа хувь хишиг хүртээж, өрх бүлээрээ ургийн баяраа хийж, төрөл саднаа мэдэлцэхэд цагаан сарын онцлог оршино хэмээсэн нь энэхүү баяр ахмад настнуудад дарамт болох ёсгүй хэмээсэн ач холбогдолтой санаа ажгуу. Түүнээс гадна эртнээс нааш ирсэн зочноо идээ ундаагаараа дайлан гаргаж, түүгээрээ хувь хишиг хүртээж ирсэн уламжлалаа даган, үндэсний үйлдвэрлэгчдээ дэмжиж хүнсний аюулгүй бүтээгдэхүүн, бэлгэдлийн чанартай соёлтой бэлэг барих замаар гадны бараа бүтээгдэхүүнээр бэлэг өгдөг зуршлаас татгалзах хэрэгтэйг уриалгадаа зориуд онцолсон байна. Хотын ерөнхий менежер уриалгынхаа төгсгөлд “Эхийн цагаан сүүгээ амлан өссөн эрхэм хүндэт иргэн та Цагаан сэтгэлийн бэлэгдэл, цаглашгүй их баяраараа айргаа сөгнөн, архинаас татгалзан  аятай, эвтэй сайхан баярлана гэдэгт итгэлтэй байна” хэмээсэн нь нийслэл хотын иргэн танд нэгийг бодогдуулна гэдэгт найднам. Үргэлжлэлийг энд дарж уншина уу.