Энэ жил эрүүл мэндийн салбарыг тойрсон олон асуудал нийгмийг сэрээж, бас айдас дагуулсаар байна. Саяхан энэ хорвоод дөнгөж мэндэлсэн бяцхан нярай, эмнэлэгт хэвтэх оргүйгээс болж, хүн болж чадалгүй буцсан харамсалтай хэрэг гарсан. Тэгвэл бас нэгэн эмчийн хариуцлага, буруутай үйлдлээс болж, гурван хүүхэд өнчирч, нэг айлын амьдрал орвонгоороо эргэж байна. 2011 оны есдүгээр сарын 8-нд  Э.Хонгорзул гуравдугаар төрөхөд гуравдахь хүүхдээ хийсвэр хийлгэн төрүүлжээ. Гэтэл өнөөдөр мэдрэлийн өвчтэй болж, төрсөн хүүхэд нь ээжийгээ танихгүй айж, уйлж байна. Өдгөө 32 настай Э.Хонгорзул бүсдын л адил ар гэр, үр хүүхдийнхээ төлөө ажиллаж, амьдарч явсан жирийн л бүсгүй. Тэрээр гуравдахь хүүхдээ төрүүлсний дараа бие нь бага зэрэг чилээрхэж, төрсний дараа арав гаруй хоног эмнэлэгт хэвтэн эмчлүүлжээ. Харин эмнэлэгээс гарснаас хойш  бие нь үе, үе өвдөж, зүүн тал руугаа эвхэрч явах болсон гэнэ. Сүүдээ халуун хоол, цай ууж идэж чадахгүй, үргэлж хүйтэн хоол иддэг байжээ. Ингэж явсаар ходоод, гэдсээ эхо, рентгенд харуулан хэд, хэдэн удаа дүүргийнхээ нэгдсэн эмнэлэгт хэвтэн эмчлүүлсэн боловч ямар ч үр дүнд хүрээгүй аж. Ингээд л оношийг тогтоож чадалгүй бараг жил гаруй өвчиндөө шаналж, өнгөрөгч оны наймдугаар сараас эхлэн өвчин сэдэрсэн байна. 2012 оны арваннэгдүгээр сарын 19-нд түгжрэл гэсэн оноштой хагалгаа хийлгэжээ. Гэтэл түүний гэдэс дотроос нэг метр гаруй урттай үзүүртэй, хатуу мод шиг болчихсон марль гарч ирсэн байна. Энэ бол Гуравдугаар төрөх эмнэлэгийн эмч н.Оюунгэрэл, сувилагч н.Ганчимэг, н.Батзаяа нарын ажлын хариуцлага алдссанаас болж хохирсон нэг өвчтөн. Гэтэл өнөөдрийг хүртэл хэн нь ч хариуцлага хүлээгээгүй, нүдэн балай, чих нь дүлий явж байна. Магадгүй нэг хүний  амийг хутганы ирмэгт хүргэснээ өнөөдрийг хүртэл ойлгохгүй байгаа бололтой. Тухайн үед хагалгаа хийсэн Госпиталийн эмч н.Хангал гэдэснээс нь марль гарч ирсэн гэдгийг ар гэрийнхэнд нь хэлсэн бөгөөд баримтжуулсан зураг авъя гэхэд нь дараа нь өгнө гээд таг болчихсон гэнэ. Удалгүй "Нөгөө зургийг манай хүүхдүүд тоглож байгаа урчихсан байна. Одоо зураггүй болчихлоо" гэсэн хариулт өгчээ. Одоо хагалгаанд орсноос хойш хоёр сар гаруй болж байгаа бөгөөд гэртээ эмчилгээ хийлгэж байгаа хэмээн нагац эгч нь ярьсан юм. Үнэндээ эмчилгээ гэж дээ. Бие нь энд тэндээ хөх, няц болчихсон, зүүний ором л  харагдсан. Э.Хонгорзулынх нь Шар хадны эцэст байдаг бөгөөд нөхөр Ж.Ганхуягтайгаа техникийн зах дээр хоёр ч лангуу ажиллуулан, сардаа сая гаруй төгрөгийн орлоготой "под" хийсэн айл байжээ. Харин эхнэр нь хүнд өвчин туссанаас хойш, энэ гэр бүлийн амьдрал тэнгэр, газар шиг өөрчлөгдөж, өнөө маргаашийн эм, тариа, өтгөний уутны мөнгийг нь тасалчихгүйн тулд эрвийх, дэрвийхээрээ зүтгэх болж. Өдөрт 20-30 мянган төгрөгийн эмчилгээ хийлгэдэг гэнэ. Өтгөний уут гэхэд 12 мянган төгрөг, мөн дуудлагаар сувилагч авчирч дусал,тариаг нь 5 мянган төгрөгөөр хийлгэдэг гэлээ. Түүнчлэн өвчин нь мэдрэлд нь нөлөөлсний улмаас орон, гаран болжээ. Э.Хонгорзултай ярилцахаар өрөөрүү нь орлоо. Гэдсэндээ наалттай, туранхай бүсгүй их л уцаартай хэвтэж байв. Тэрээр "Энэ ширээ арчаач ээ. Эд нарт юм хэлэхээр ерөөсөө нэмэргүй. Би цай уумаар байна" хэмээн үглэж байлаа. - Сайн байна уу та? Бие нь сайн уу? - Бие ер нь зовиуртай байгаа. Дусал хийлгэж байгаа. Нээрээ утсаар ярьхаа мартчихсан байна. Алив утас гэлээ. -Та хэдэн настай вэ? - Юу билээ нас гээд хажуудах дүүгээсээ асуув. Тэгснээ тоо сурч байгаа хүүхэд шиг гараа гозойлгон гурав, хоёр гэж харууллаа." Үргэлжлэлийг энд дарж уншина уу