Испанийн хэвлэлүүдийн мэдээлж байгаагаар “Барселона” Бразилийн “Сантос” багтай тэдний довтлогч Нэймарыг авах тохиролцоог хийсэн гэнэ. Бразилийн тун авьяаслаг, ирээдүйтэй хөлбөмбөгчин тэрбээр Каталонийн багт энэ оны зун очих бололтой. Хоёр багийн удирдлага 20 настай бразил тамирчны төлөөлөгч компанитай хамтарч холбогдох хэлэлцээрт хүрсэн байна. Нэймар долоодугаар сарын эхээр Испанид ирэх аж. Мадридын “Реал” баг түүнийг авахаар уйгагүй хөөцөлдсөн ч амжилт олсонгүй. Түүнчлэн их хэмжээний мөнгөтэй Английн клубууд, Оросын “Анжи” баг ч түүнийг сонирхож байсан билээ.