Төрийн соёрхолт дуучин Д.Болдын бие даасан арав дахь “Монгол поп II” цомгийн хэвлэлийн бага хурал өнөөдөр Блью Скай цамхагийн 3 дугаар давхарт байрлах “Diamond” танхимд боллоо. Хэвлэлийн хуралд “Монгол поп II” цомгийг бүтээхэд оролцсон уран бүтээлчид болон “Камертон II” шоуны ялагчид оролцсон юмТэрбээр энэ үеэр “Монгол поп II” цомогт багтсан “Үүлэн домог”, “Намрын тухай бодол”, “Чамдаа би хайргүй байхын аргагүй”,   “Хүн болж төрсөн минь учиртай” зэрэг дуунуудыг амьд хөгжмийн хамт дуулж сонирхууллаа. “Үүлэн домог” дууны аялгууг бүтээхэд бөөгийн цан хэнгэрэгийн дууг оруулж, орчин үеийн хөгжмийн зэмсэгтэй нэгтгэсэн гэлээ. Р.Чойномын одоогоос 47 жилийн өмнө зохиож байсан “Намрын тухай бодол” шүлгийг дуу болгох хүсэлтээ Р.Чойномын өвийг хамгаалах “Өд” сангийн тэргүүн Д.Ганболдоос албан ёсны зөвшөөрөл авч дуу болгожээ. Мөн Ардын уран зохиолч, Соёлын гавьяат зүтгэлтэн, төрийн шагналт Б.Лхагвасүрэнгийн “Чамдаа би хайргүй байхын аргагүй” шүлгийг гэрт очиж зөвшөөрөл авсан гэв. Түүнчлэн энэхүү цомогт багтсан “Хүн болж төрсөн минь учиртай” дууг өнгөрсөн онд Төрийн соёрхол хүртсэний дараа ээжийнхээ баярын нулимсийг хараад үгийг нь зохиосон аж. Дуучин Д.Болд энэ үеэр “Монгол поп бол зөвхөн дуу биш. Монгол поп бол монгол бахархалын нэгдэл, монгол түмнийг бусад үндэстнээс ялгаж байгаа соёл, зан заншил, эд өлгийн цогц байна. Уламжлалгүй шинэчлэл, шинэчлэлгүй уламжлал гэж байхгүй. Үүнтэй адил монгол поп авъяас билэг төгөлдөр өвөг дээдсийн бурхан ухааныг мөнхөд магтан дуулж, уран бүтээлээ сурталчилах болно. Монголын өв соёл уламжлалийг зүгээр нэг бахархаж үзмэрийн танхимаас хараад өнгөрдөг биш хойч үе маань өнгөрсөн одоо ирээдүйг хослуулж чаддаг болох ёстой. Ингэснээр э монгол гэдэг үндэстэн үеийн үед өв соёл уламжлалаа хадгалж үлдэнэ. Түүнчлэн монголынхоо нэртэй уран бүтээлчдийг шүлгийг дуу болгосон. Энэ бол тэдний бидэнд үлдээж буй өв. Зүгээр нэг шүлэг гэдэг утгаараа биш орчин үеийн хөгжмийн урсгалд тэднийг оруулсанаар ахмад үеийнхэний бидэнд хүргэж буй сургаал мэт болох юм. Мөн энэ оны нэгдүгээр сарын 1-ээс худалдаанд гарч эхэлсэн  “Монгол поп II” цомгийг энэ сарын 2-ноос эхлэн ухаалаг гар утасны  ITunes-т оруулсан. Ухаалаг гар утсанд зориулсан бүтээсэн энэхүү аппликейшн нь Монголын рок попын түүхэнд анхны тохиолдол болж байгаа. Энэхүү цомгийг ухаалаг гар утас хэрэглэгчид дуртай цагтаа сонсож болно. Гэхдээ 14 хоногийн дараа албан ёсоор ITunes-т идвэхижнэ. Мөн тун удахгүй www.amazon.com цахим сайтаар дэлхий даяар борлуулагдаж эхэлнэ” гэв. П.Наран Гэрэл зургийг Б.Мөнх-Эрдэнэ