Дорноговь аймгийн Замын-Үүд суманд "Хадгаламж" банкинд дээрмийн хэрэг гарсан талаар зарим сайтуудаар мэдээлж байна. Энэ талаар тус сумын Цагдаагийн хэлтсийн дарга н.Батчулуунаас албан ёсны мэдээллийг авлаа. -Хадгаламж банкинд гарсан дээрмийн хэргийг хэдэн хүн үйлдсэн бэ. Гэмтэж бэртсэн хүн бий юу? -Гэмтэж бэртсэн хүн байхгүй. Амны хаалт зүүсэн нэг этгээд  өчигдөр орой Хадгаламж банкинд халдаж  хоёр сая төгрөг дээрэмдсэн хэрэг гарсан. Сэжигтнийг эрэн сурвалжлах ажил явагдаж байна. -Буу барьсан этгээд дээрэм хийсэн гэсэн мэдээлэл байна. Энэ үнэн үү? -Галт зэвсэг барьсан хүн дээрэм хийсэн гэх мэдээлэл ташаа. Одоогоор хэргийг шалгаж байгаа учраас дэлгэрэнгүй мэдээлэл өгөх боломжгүй. Жич: “Хадгаламж” банкны салбарт өчигдөр 19.30 цагт гарсан халдлагыг  25-30 орчим насны хар куртка, улаан пүүз өмссөн эмэгтэй байсан гэдгийг зарим эх сурвалж хэлж байна. Н.Түвшин