УИХ-ын гишүүн асан Д.Дондог, түүний туслах Д.Сайнбаяр, “Суман бар” компанийн захирал А.Батбилэг нарт холбогдох хэргийг нийслэлийн Прокурорын газраас Сүхбаатар дүүргийн шүүх рүү өчигдөр шилжүүлжээ. УИХ-ын гишүүн асан Д.Дондонгийг Эрүүгийн хуулийн 148.4-т зааснаар “Бусдын эд хөрөнгийг залилан мэхэлж авсан, онц аюултай гэмт хэргийг зохион байгуулалттайгаар бүлэглэн үйлдсэн, энэ хэргийн улмаас бусдад онц их хэмжээний хохирол учруулсан” гэх үндэслэлээр  буруутгаж буй.

Тэрбээр  “Меридан” гэх компанид “А” зэрэглэлийн бүсэд  орон сууц барих газрын зөвшөөрөл гаргаж өгөх нэрийдлээр 242 мянган ам.доллар буюу 400 орчим сая төгрөг авсан нь мөрдөн байцаалтын явцад тогтоогджээ. Түүнчлэн "Цанын бааз" барих газар олж өгнө хэмээн бас нэгэн компанийг залилжээ. Тэдэнд тав хүртэлх жилийн хорих ял төлөвлөсөн байна.

Хууль, хяналтын байгууллагад шалгагдаж буй томоохон агентлагуудын дарга, зарим  улстөрчдийн хэрэг эхнээсээ шүүхээр шийдвэрлэгдэж ял сонсоод буй. Тухайлбал, ерөнхийлөгч асан Н.Энхбаяр, АМГ-ын дарга асан Д.Батхуяг нарыг дурдаж болно. Тэдний араас ойрын хугацаанд шүүхийн хаалга татах эрхэм бол бусдад газрын зөвшөөрөл гаргаж өгнө хэмээн их хэмжээний мөнгө залилж, түүнийгээ сонгуулийн суралчилгааны үеэр ашигласан хэрэгт буруутгаад байгаа  УИХ-ын гишүүн асан Д.Дондог болоод байна. Энэ хэргийн шүүх хурлыг товлох хуулийн  хугацаа ирэх долоо хоногт дуусгавар болж байгаа бөгөөд Сүхбаатар дүүргийн шүүхээс зарлах юм. Түүнийг УИХ-ын гишүүнээр ажиллаж байх үед хуулийнхан шалгаж эхэлсэн боловч гишүүний бүрэн эрхийн хүрээнд хэргийг хянаж, шийдвэрлэх явцад саад учирчээ. Өөрөөр хэлбэл, хэргийг түдгэлзүүлээд байсан билээ. Харин одоо түүний УИХ-ын гишүүний бүрэн эрхийн хугацаа дууссан тул хэргийг өнгөрсөн долдугаар сараас дахин шалгаж эхэлжээ. Тэрбээр өнгөрсөн 2008 оны хоёрдугаар сарын 8-нд өөрийн шадар туслах Г.Сайнбаяртай хамтран “Меридан” гэх компанид орон сууц барих газрын зөвшөөрөл гаргаж өгөх нэрийдлээр 242 мянган ам.доллар буюу 400 орчим сая төгрөг залилсан. Энэ мөнгөө тухайн жил болсон УИХ-ын сонгуулийн сурталчилгаанд ашигласан  нь мөрдөн байцаалтын явцад тогтоогджээ. Залилангийн гэж хэлж болох энэхүү хэрэгт туслах Г.Сайнбаяр, А.Батбилэг, Л.Мөнхсайхан, А.Ариунболд, Д.Баасанхүү нарын 10 гаруй хүнийг холбогдуулан шалгаж байгаа аж. УИХ-ын гишүүн асан Д.Дондогийг Эрүүгийн хуулийн 148.4-т зааснаар “Бусдын эд хөрөнгийг залилан мэхэлж авсан, онц аюултай гэмт хэргийг зохион байгуулалттайгаар бүлэглэн үйлдсэн, энэ хэргийн улмаас бусдад онц их хэмжээний хохирол учруулсан” гэх үндэслэлээр  буруутгаж буй.

Эх сурвалжийн мэдээллээр   холбогдох хуулийн байгууллагаас экс гишүүнд  хууль бус газрын наймаатай холбоотой  хэрэгт нь таван жилийн хорих ял төлөвлөсөн байна. Уг хэрэгт Эрүүгийн цагдаагийн газрын Эдийн засгийн гэмт хэрэгтэй тэмцэх хэлтсийн ажилтан н.Ариунболд гэгч  хамтран оролцогчоор шалгагдаж яллагдагчаар татагджээ. н.Ариунболдыг албан тушаалаа ашиглан хээл хахууль авсан хэрэгт буруутган Д.Дондогтой хамтран хэрэг үйлдсэн гэж үзэж байгаа юм.

Хэргийн талаар товч сануулбал, Д.Дондог нь 2009 онд иргэн А.Батбилэг, Д.Сайнбаяр, Д.Ширнэндорж нартай хамтран “Барилга барих газар олж өгнө” хэмээн нэгэн компанийн захирлыг мэхэлсэн гэх хэрэгт холбогдсон.

Гэхдээ уг хэргийг АТГ, УМБГ-т шалгаагүйн учир нь цагдаагийн ажилтан холбогдсонтой холбоотой гэнэ. Д.Дондог УИХ-ын 2008 оны сонгуульд оролцохын өмнө хотын “А” зэрэглэлийн бүсэд барилга барих газар хайж байсан “Меритон” компанийн удирдлагад “Надад мөнгө яаралтай хэрэгтэй байна. Газрын асуудлыг жич шийдэж өгч болно. Би зөвхөн сонгуульд ялах нь чухал байна” гэж хэлсэн тухай  гэрчүүдийн мэдүүлэгт дурдагдсан байдаг.

Улмаар тус компаниас “Сум бар” ХХК-ийн А.Батбилэг, өөрийн туслах Д.Сайнбаяр нараар дамжуулан мөнгө авсан аж. “Меритон” компаниас нэг сая гаруй доллар авч, 300 мянган ам.доллар, 400 сая төгрөгийг нь Д.Сайнбаяр авч Д.Дондогийн сонгуулийн ажилд зориулсан гэнэ. Гэвч нөгөө газар нь бүтэхгүй болсон учраас “Меритон” компанийнхан хохирлоо олж авахын тулд хууль хяналтын байгууллагад хандсанаар мөрдөн байцаалтын ажиллагаа эхэлсэн байна.  Зарим эх сурвалжийн хэлэхээр Д.Дондогийн газрын наймаатай холбоотой хэрэгт  н.Ариунболдоос гадна хэд хэдэн цагдаагийн ажилтнууд холбогдоод буй сурагтай.

-