Цагаан сарын үеэр мах гурилын үнэ тэнгэрт тулж аль нь илүү үнээ нэмж чадахаа үзэх гэж байгаа мэт боллоо. Захуудаар Казакстаны Цесна гэх гурилын үнэ 2000 төгрөг болж дээд ханш тогтоосон ч лангуун дээр харагдахаа больжээ. Хэрэглэгчид захын борлуулагч нараас “Алтан тариа”-н ширхэгтэй дээд, дээдийн дээд гурил хамгийн их асууж сураглаж байгаа гэнэ. Хэдийгээр үнэ нь 1200-1400 төгрөг хүрсэн ч хайгаад олдохгүй бас л нөөцгүй болсон бололтой. Энэ жил буудайны чанар муугаас дээд зэрэглэлийн гурилын үйлдвэрлэл багасч ширхэгтэй дээд, дээдийн дээд гурилын нөөц аль эрт дууссан гэнэ. Харин “Алтан тариа”-н дээд гурил эрэлт ихтэй, борлуулалт ч сайн, үнэ нь ч боломжийн нэг кг нь 780 төгрөг буюу уутаараа 19500 төгрөг байна. “Улаанбаатар”, “Милл хаус үйлдвэрүүд дээд гурил гэж бараг гаргадаггүй гэх ба нэгдүгээр гурил нь 580-620 төгрөгөөр зарагдаж байна. Сар шинийн баяр дөхөж хүмүүс бууз, идээгээ бэлтгэж байгаа энэ үед нэг хэсэг урсаж, нялцайлаа гэж хэл ам болоод байсан “Алтан тариа”-н дээд гурил л зах, дэлгүүрүүдээр худалдаалагдаж, цагаан сарын буузны гол гурил болоод байна. Дээд гурилыг өндөг хийж, давстай бүлээн усаар зуурвал сайн байна гэх үгийг наймаачид ярьж байна. А.АНУ