Казиногийн тоглоомыг нуун хаацайлсан хэмээн сэжиглэгдэж байгаа бөгөөд  шийтгэл хүлээхээс бултан Польшид нуугдаж байсан  Москва мужийн прокурорын нэгдүгээр орлогч асан Александр Игнатенког Орост шилжүүлэн өгчээ. Польшийн эрх баригчдын төлөөлөгчид бүхий л шаардлагатай баримт бичгийг бүрдүүлсний дараа түүнийг оросын цагдаагийн байгууллагын ажилтнуудад хүлээлгэн өглөө гэж ДХЯ-ны хэвлэлийн албанаас мэдээлсэн байна. Хуучин прокурор тоглоомын хууль бус үйлдэлд холбогдсон хамгийн дээд албан тушаалтан юм. “Бүлэг хүмүүс хахууль авсан”, “Онцгой их хэмжээний луйвар хийсэн” гэсэн ОХУ-ын эрүүгийн хуулийн хоёр зүйл ангиар яллагдагчаар татагдаж буй  Игнатенко 2011 онд Оросоос гарч, хаашаа явсан нь мэдэгдэхгүй алга болжээ.  Өнгөрсөн оны нэгдүгээр сарын эхээр түүнийг Польшийн уулын цанын Закопанын баазаас баривчилсан байна. Энд тэр Литвийн хуурамч паспортаар иржээ. Москва мужид нууц казиногийн сүлжээ ажиллаж, эзэд нь хүчний байгууллагынхны ивээлд байдаг гэж  2011 оны эхээр Оросын аюулаас хамгаалах албанаас мэдэгдсэн юм. Нууц бизнесийнхэн орлогоо прокурорын болон цагдаагийн ажилтнуудтай хуваадаг байжээ.  Мөрдөн шалгах ажлын явцад  хүчний байгууллагын арваад хүнийг баривчилсан ч, яваандаа тэд бүгдээрээ суллагдсан байна. Одоо уг хэрэгт холбогдсон нэг хүн ял эдлээгүй ажээ. С.Золбоо